జిల్లా ప్రజలకు దసరా శుభాకాంక్షలు తెలిపిన ఎస్పీ స్నేహ మెహ్రా

వికారాబాద్ జిల్లా ప్రతినిధి, మేజర్ న్యూస్: విజయానికి ప్రతీకగా నిలిచే విజయదశమి పర్వదినాన్ని పురస్కరించుకుని వికారాబాద్ జిల్లా ప్రజలకు జిల్లా ఎస్పీ స్నేహ మెహ్రా హృదయపూర్వక దసరా శుభాకాంక్షలు తెలిపారు. దసరా పండుగ ప్రతి ఒక్కరి జీవితాల్లో సుఖసంతోషాలు, శాంతి, సౌభాగ్యాలు నింపాలని, ప్రతి కుటుంబం ఆనందంగా వర్ధిల్లాలని ఆకాంక్షించారు. చెడుపై మంచి సాధించిన విజయానికి ప్రతీకగా దసరా పండుగ నిలుస్తుందని పేర్కొన్నారు. ప్రజలందరూ కుటుంబ సభ్యులతో కలిసి పండుగను ఆనందోత్సాహాలతో జరుపుకోవాలని, ఈ సందర్భంగా శాంతిభద్రతలకు విఘాతం కలగకుండా పోలీసులకు సహకరించాలని కోరారు. ప్రయాణాల సమయంలో ట్రాఫిక్ నిబంధనలు పాటించాలని, మద్యం సేవించి వాహనాలు నడపరాదని సూచించారు. జిల్లా ప్రజలందరూ పరస్పర ప్రేమాభిమానాలు, సోదరభావంతో పండుగను శాంతియుతంగా జరుపుకోవాలని ఎస్పీ స్నేహ మెహ్రా ఆకాంక్షించారు.