ఇందిరమ్మ ఇళ్ల జాబితాలో పేరు లేదని మహిళ నిరసన

భీమదేవరపల్లి, మేజర్ న్యూస్, ఇందిరమ్మ ఇళ్ల రెండో విడత మంజూరు జాబితాలో పేరు లేకపోవడంతో మండలంలోని ముత్తారం గ్రామానికి చెందిన నద్దునూరి స్వరూప గురువారం నిరసనకు దిగారు. తన ఇద్దరు కుమారులతో కలిసి గ్రామపంచాయతీ కార్యాలయం ఎదుట బైఠాయించి ఆవేదన వ్యక్తం చేశారు. ప్రభుత్వం నిరుపేదలకు సొంతింటి కలను సాకారం చేసేందుకు ఇందిరమ్మ ఇళ్ల పథకాన్ని అమలు చేస్తున్నప్పటికీ, అర్హులైన తనకు ఇల్లు మంజూరు కాకపోవడంపై ఆమె అసంతృప్తి వ్యక్తం చేశారు. రెండో విడత జాబితాలోనూ పేరు లేకపోవడంతో నిరాశకు గురైనట్లు తెలిపారు. తన కుటుంబ పరిస్థితులను పరిగణనలోకి తీసుకుని, లబ్ధిదారుల ఎంపికలో అర్హతను మరోసారి పరిశీలించాలని కోరారు. జాబితాలో పేరు లేకపోవడానికి కారణాలను అధికారులు స్పష్టం చేసి, అర్హత ఉంటే ఇల్లు మంజూరు చేసి న్యాయం చేయాలని విజ్ఞప్తి చేశారు.

రిపోర్టర్, రామకృష్ణ ,భీమదేవరపల్లి, హనుమకొండ జిల్లా