ఎయిడ్స్ వ్యాధి నియంత్రణ పై విద్యార్థులకు వ్యాసరచన, క్విజ్ పోటీలు

నారాయణపేట, సూర్యన్యూస్ :

యువతలో సరైన అవగాహన కల్పించడం ద్వారా హెచ్‌ఐవీ వ్యాప్తిని అరికట్టడానికి అవకాశం ఉంటుందని ప్రోగ్రాం ఆఫీసర్ డా.సత్య ప్రకాష్ రెడ్డి అన్నారు. నారాయణపేట జిల్లా వైద్య ఆరోగ్య శాఖ ఆధ్వర్యంలో స్థానిక ప్రభుత్వ జూనియర్ కళాశాలలో మంగళవారం హెచ్‌ఐవీ/ఎయిడ్స్ అవగాహన కార్యక్రమం నిర్వహించారు. ఈ సందర్భంగా ఆయన మాట్లాడుతూ.. యువతలో హెచ్‌ఐవీ/ఎయిడ్స్‌పై అవగాహన పెంపొందించడంతో పాటు, హెచ్‌ఐవీ వ్యాప్తి నివారణ, ముందస్తు పరీక్షలు, చికిత్స, హెచ్‌ఐవీతో జీవిస్తున్న వ్యక్తుల పట్ల వివక్షను నివారించేందుకు ప్రతి ఒక్కరికి అవగాహన కల్పించేందుకు ప్రయత్నిస్తున్నామని చెప్పారు. ఈ సందర్భంగా హెచ్‌ఐవీ ఎలా వ్యాపిస్తుంది, హెచ్‌ఐవీ నివారణ చర్యలు, హెచ్‌ఐవీ పరీక్షల ప్రాముఖ్యత, చికిత్స అందుబాటులో ఉండటం, సురక్షితమైన జీవన విధానం మరియు హెచ్‌ఐవీతో జీవిస్తున్న వ్యక్తుల పట్ల వివక్ష చూపకుండా సమాన గౌరవంతో వ్యవహరించడం వంటి అంశాలపై విద్యార్థులకు అవగాహన కల్పించారు. అనంతరం నిర్వహించిన వ్యాసరచన, క్విజ్ పోటీల్లో విద్యార్థులు ఉత్సాహంగా పాల్గొన్నారు. ప్రతిభ చూపిన విద్యార్థులకు.  బహుమతులు  అందజేశారు. కార్యక్రమంలో ఇంటర్మీడియట్ నోడల్ ఆఫీసర్ సుదర్శన్ రావు, వైద్య ఆరోగ్య సిబ్బంది, లెక్షరర్లు పాల్గొన్నారు.
– రాజేష్ కుమార్, సూర్య రిపోర్టర్ నారాయణపేట.