ఈస్ట్ ఆనంద్‌బాగ్‌లో వైభవంగా శరన్నవరాత్రులు: మహిషాసుర మర్దినిగా దర్శనమిచ్చిన జ్ఞాన సరస్వతి అమ్మవారు.. ఘనంగా సామూహిక కుంకుమార్చన!
మల్కాజిగిరి, మేజర్ న్యూస్ : ఈస్ట్ ఆనంద్‌బాగ్‌లోని శ్రీ జ్ఞాన సరస్వతి దేవాలయంలో దేవీ శరన్నవరాత్రి మహోత్సవాలు అత్యంత వైభవంగా, భక్తిశ్రద్ధల నడుమ కొనసాగుతున్నాయి. ఉత్సవాల్లో భాగంగా 9వ రోజున శ్రీ జ్ఞాన సరస్వతి అమ్మవారు భక్తులకు 'శ్రీ మహిషాసుర మర్దిని దేవి' అవతారంలో దివ్య దర్శనమిచ్చారు. దుష్టశిక్షణ, శిష్టరక్షణకు ప్రతీకగా నిలిచే ఈ రౌద్ర రూప అలంకారంలో దర్శనమిచ్చిన అమ్మవారిని చూసేందుకు భక్తులు పెద్ద సంఖ్యలో తరలివచ్చారు.
సామూహిక కుంకుమార్చనలో పాల్గొన్న మహిళా భక్తులు:
ఈ సందర్భంగా ఆలయ ప్రాంగణంలో మహిళా భక్తుల ఆధ్వర్యంలో విశేష సామూహిక కుంకుమార్చన కార్యక్రమాన్ని శాస్త్రోక్తంగా నిర్వహించారు. లలితా సహస్రనామ పారాయణాల నడుమ జరిగిన ఈ పూజలతో ఆలయం ఆధ్యాత్మిక శోభతో విలసిల్లింది. లోకకల్యాణార్థం, భక్తుల సర్వాభీష్ట సిద్ధికై అమ్మవారికి ప్రత్యేక పంచామృతాభిషేకాలు, విశేష హారతులు సమర్పించినట్లు ఆలయ ప్రధాన అర్చకులు శ్రీ మాడుగుల రాజశేఖర్ శర్మ తెలిపారు. నవరాత్రి ఉత్సవాల సందర్భంగా అమ్మవారిని దర్శించుకుని తీర్థప్రసాదాలు స్వీకరించిన భక్తులకు ఆలయ కమిటీ వారు ప్రత్యేక ఏర్పాట్లు చేశారు.
