దొంగ అరెస్ట్ - నగదు స్వాధీనం - తళమడుగు ఎస్‌హెచ్‌ఓ డి. రాధిక
సూర్య ఆదిలాబాద్ ప్రతినిధి : తళమడుగు మండలం దేవాపూర్ గ్రామంలో ఇంట్లో చోరీకి పాల్పడిన నిందితుడిని తాళమడుగు పోలీసులు అరెస్ట్ చేసి, చోరీ సొత్తును స్వాధీనం చేసుకున్నట్లు తలమడుగు ఎస్ఐ డి రాధిక తెలియజేశారు.ఈ నెల 21వ తేదీ రాత్రి దేవాపూర్ గ్రామంలో శారదాదేవి విగ్రహ నిమజ్జన ఊరేగింపు జరుగుతున్న సమయంలో గ్రామానికి చెందిన అంగ రాజు తన భార్య, పిల్లలతో కలిసి ఊరేగింపుకు వెళ్లాడు. తిరిగి అర్ధరాత్రి ఇంటికి వచ్చి చూడగా బీరువా తాళం పగులగొట్టి ఉండటాన్ని గమనించాడు. పరిశీలించగా మూడు తులాల వెండి పట్టీలు, రూ.15,000 నగదు కనిపించకపో వడంతో పోలీసులకు ఫిర్యాదు చేశాడు. ఈ మేరకు తాళమడుగు పోలీస్ స్టేషన్‌లో కేసు నమోదు చేసి దర్యాప్తు చేపట్టారు.
దర్యాప్తులో భాగంగా ఈ నెల 24వ తేదీ ఉదయం కజ్జర్ల ఎక్స్‌రోడ్డు సమీపంలో పోలీసులు పెట్రోలింగ్ నిర్వహిస్తుండగా, పోలీసులను చూసి పారిపోవడానికి ప్రయత్నించిన వ్యక్తిని పట్టుకుని విచారించారు. అతడు ఆదిలాబాద్‌లోని కేఆర్‌కే కాలనీకి చెందిన మాకల రాజు (35), ప్రస్తుతం దేవాపూర్‌లో ఉంటున్నట్లు గుర్తించారు. విచారణలో చోరీకి పాల్పడినట్లు వెల్లడైంది.నిందితుడి వద్ద నుంచి మూడు తులాల వెండి పట్టీలు, రూ.10,130 నగదు, హోండా యాక్టివా ద్విచక్ర వాహనం, రెడ్‌మీ సెల్‌ఫోన్ స్వాధీనం చేసుకున్నారు. చోరీ చేసిన నగదులో కొంత ఖర్చు చేసినట్లు విచారణలో వెల్లడైంది.
