ఒకేచోట.. సర్కారు కొలువు!
దేవరకొండ ప్రతినిధి నవంబర్ 13:(మేజర్ న్యూస్ )
ప్రభుత్వ కార్యాలయాల చుట్టూ తిరిగే ప్రజల కష్టాలకు తెరదించడంతో పాటు, అన్ని ప్రభుత్వ శాఖల సేవలను ఒకే ప్రాంగణంలో అందుబాటులోకి తీసుకురావాలనే లక్ష్యంతో దేవరకొండలో సమీకృత ప్రభుత్వ కార్యాలయాల సముదాయం నిర్మాణానికి కార్యాచరణ మొదలైంది. ఇందుకోసం సుమారు రూ.25 కోట్ల నిధులతో చేపట్టనున్న ఇంటిగ్రేటెడ్ ప్రభుత్వ కార్యాలయాల భవన నిర్మాణానికి సంబంధించి శుక్రవారం ఎమ్మెల్యే నేనావత్ బాలు నాయక్ క్షేత్రస్థాయిలో స్థల పరిశీలన నిర్వహించారు.పట్టణంలోని 18వ వార్డు పరిధిలో, పోలీస్ స్టేషన్ సమీపాన ఉన్న ఆర్‌అండ్‌బీ గెస్ట్‌హౌస్ పక్కన ప్రతిపాదిత స్థలాన్ని ఎమ్మెల్యే పరిశీలించారు. దేవరకొండ ఆర్డీవో, తహసీల్దార్‌తో పాటు సంబంధిత శాఖల అధికారులతో కలిసి స్థల పరిస్థితులను సమీక్షించారు. భవన నిర్మాణానికి స్థలం ఎంతవరకు అనుకూలంగా ఉంది? అవసరమైన మౌలిక వసతులు ఎలా ఉన్నాయి? ప్రజలు సులభంగా చేరుకునేందుకు రవాణా సౌకర్యాలు ఎలా ఉంటాయి? అనే అంశాలపై అధికారులను వివరాలు అడిగి తెలుసుకున్నారు.
ఒకే ప్రాంగణంలో.. అన్ని సేవలు!
ప్రస్తుతం వివిధ ప్రభుత్వ పనుల నిమిత్తం ప్రజలు ఒక్కో శాఖ కార్యాలయానికి వెళ్లాల్సి వస్తోంది. ఒక కార్యాలయం నుంచి మరో కార్యాలయానికి తిరగడం వల్ల సమయం, ప్రయాణ ఖర్చులు వృథా అవుతున్నాయి. ముఖ్యంగా గ్రామీణ ప్రాంతాల నుంచి వచ్చే ప్రజలు ఒకే రోజు తమ పనులన్నీ పూర్తి చేసుకోవడం ఇబ్బందిగా మారుతోంది. ఈ నేపథ్యంలో సమీకృత ప్రభుత్వ కార్యాలయాల సముదాయం అందుబాటులోకి వస్తే వివిధ శాఖల సేవలు ఒకే ప్రాంగణంలో పొందే అవకాశం కలుగుతుంది. ప్రజలకు పరిపాలన మరింత చేరువ కావడంతో పాటు ప్రభుత్వ సేవల్లో వేగం పెరిగే అవకాశం ఉంటుంది.
నిర్మాణ ప్రక్రియ వేగవంతం చేయాలి
ప్రజలకు మెరుగైన పరిపాలన, సత్వర ప్రభుత్వ సేవలు అందించడమే లక్ష్యమని ఎమ్మెల్యే బాలు నాయక్ పేర్కొన్నారు. ఇంటిగ్రేటెడ్ కార్యాలయాల సముదాయం నిర్మాణం పూర్తయితే దేవరకొండ పట్టణంతో పాటు పరిసర ప్రాంతాల ప్రజలకు ఎంతో ప్రయోజనం చేకూరుతుందని తెలిపారు. నిర్మాణానికి సంబంధించి అవసరమైన తదుపరి చర్యలను వేగవంతం చేయాలని, స్థల పరిశీలన అనంతరం చేపట్టాల్సిన ప్రక్రియపై అధికారులు సమగ్రంగా దృష్టి సారించాలని సూచించారు.దేవరకొండ పట్టణంలో ప్రభుత్వ కార్యాలయాలన్నీ ఒకే వేదికపైకి వస్తే పరిపాలనా సౌలభ్యం పెరగడంతో పాటు ప్రజలకు మెరుగైన సేవలు అందించేందుకు వీలవుతుందని ఈ సందర్భంగా పేర్కొన్నారు.ఈ స్థల పరిశీలన కార్యక్రమంలో మున్సిపల్ చైర్‌పర్సన్ పున్న వెంకటేశ్వర్లు, ఆలంపల్లి నర్సింహా, హనుమంతు వెంకటేష్ గౌడ్, పట్టణ కాంగ్రెస్ అధ్యక్షుడు మహ్మద్ రయీస్, మండల కాంగ్రెస్ అధ్యక్షుడు మారుపాకుల సురేష్ గౌడ్, వడ్త్యా దేవేందర్ నాయక్, లోకసాని శ్రీధర్ రెడ్డి, వై.ఎస్. కరుణాకర్, కాంగ్రెస్ పార్టీ నాయకులు, సంబంధిత శాఖల అధికారులు తదితరులు పాల్గొన్నారు
