telanagana
ఆర్టీసీలో మోగిన ఎన్నికల నగారా
కరీంనగర్ రీజియన్లో వేడెక్కనున్న గుర్తింపు సంఘం ఎన్నికల సమరం…
సూర్య కరీంనగర్ ప్రతినిధి:
తెలంగాణ ఆర్టీసీలో గుర్తింపు సంఘం ఎన్నికలకు నగారా మోగింది. సుదీర్ఘ విరామం తర్వాత ఈ నెల 21 నుంచి ఎన్నికల ప్రక్రియ ప్రారంభం కాగా, అక్టోబర్ 9న ఉదయం 5 నుంచి సాయంత్రం 6 గంటల వరకు పోలింగ్, అక్టోబర్ 17న ఫలితాలు ప్రకటించనున్నారు.
కరీంనగర్ రీజియన్లోని డిపోలు, వర్క్షాపుల్లో ఎన్నికల సందడి మొదలుకానుంది. వేతన సవరణ, డీఏలు, బకాయిలు, బోనస్, సర్వీస్ నిబంధనలు, పని ఒత్తిడి, సిబ్బంది కొరత, ఉద్యోగ భద్రత వంటి సమస్యలు ప్రచారంలో ప్రధాన అంశాలుగా మారనున్నాయి. తెలంగాణ మజ్దూర్ యూనియన్, స్టాఫ్ అండ్ వర్కర్స్ యూనియన్, ఎంప్లాయీస్ యూనియన్, స్టాఫ్ అండ్ వర్కర్స్ ఫెడరేషన్, బహుజన కార్మిక సంఘం, తెలంగాణ వర్కర్స్ యూనియన్ తదితర సంఘాలు ఎన్నికలకు సిద్ధమవుతున్నాయి.
సెప్టెంబర్ 26న పోటీ చేసే యూనియన్లకు ఎన్నికల గుర్తులు కేటాయించనుండటంతో ప్రచారం మరింత ఊపందుకోనుంది. ఆర్టీసీని ప్రభుత్వంలో విలీనం చేసే అంశంపైనా ఎన్నికల్లో చర్చ జరిగే అవకాశం ఉంది. గుర్తింపు పొందిన సంఘానికి కార్మికుల సమస్యలపై యాజమాన్యం, ప్రభుత్వంతో అధికారికంగా చర్చించే అవకాశం ఉండటంతో ఎన్నికలకు ప్రాధాన్యం ఏర్పడింది.
