అక్టోబర్ 1లోగా ఫార్మర్ రిజిస్ట్రేషన్ పూర్తి చేయాలి

జిల్లా వ్యవసాయాధికారి కవిత సూచన
అధికారిక పోర్టల్‌లో రిజిస్ట్రేషన్ స్టేటస్ చెక్ చేసుకోవాలి
ఏఈఓలు, మీసేవ, సిఎస్ సి కేంద్రాల ద్వారా నమోదుకు అవకాశం
వికారాబాద్ జిల్లా ప్రతినిధి, మేజర్ న్యూస్ (సెప్టెంబర్ 21):
రైతులు ప్రభుత్వ వ్యవసాయ పథకాలు, ఎరువులు, విత్తనాలు మరియు ఇతర సేవలను నిరంతరాయంగా పొందేందుకు 'ఫార్మర్ రిజిస్ట్రేషన్ ఐడీ' తప్పనిసరి అని జిల్లా వ్యవసాయాధికారి కవిత తెలిపారు. 2026 అక్టోబర్ 1వ తేదీలోగా జిల్లాలోని రైతులందరూ ఫార్మర్ రిజిస్ట్రీలో తమ వివరాలను పూర్తి స్థాయిలో నమోదు చేసుకోవాలని ఆమె స్పష్టం చేశారు.ఈ సందర్భంగా ఆమె మాట్లాడుతూ.. కేంద్ర, రాష్ట్ర ప్రభుత్వాలు అమలు చేసే వివిధ సంక్షేమ పథకాలు, రాయితీ సేవలు పొందడానికి ఈ ఐడీ ఎంతో కీలకమని పేర్కొన్నారు. రైతులు తమ రిజిస్ట్రేషన్ ఐడీ స్థితి (Status)ని తెలుసుకునేందుకు అధికారిక వెబ్‌సైట్ https://tlfr.agristack.gov.in/farmer/registry ని సందర్శించి ఐడీని ధృవీకరించుకోవచ్చని సూచించారు.ఇప్పటివరకు రిజిస్ట్రేషన్ పూర్తి చేసుకోని రైతులు వెంటనే తమ పరిధిలోని వ్యవసాయ విస్తరణాధికారి (AEO)ను కానీ, సమీపంలోని కామన్ సర్వీస్ సెంటర్ (CSC)/మీసేవ కేంద్రాలను కానీ సంప్రదించి ప్రక్రియను పూర్తి చేసుకోవాలని కోరారు. పెండింగ్‌లో ఉన్న రిజిస్ట్రేషన్లను నిర్దేశిత గడువులోగా పూర్తి చేయడానికి క్లస్టర్ల వారీగా ప్రత్యేక చర్యలు చేపట్టాలని వ్యవసాయ శాఖ అధికారులకు స్పష్టమైన ఆదేశాలు జారీ చేసినట్లు తెలిపారు. ప్రభుత్వ సేవలు నిలిచిపోకుండా ఉండాలంటే రైతులందరూ వెంటనే స్పందించి అక్టోబర్ 1లోగా ఫార్మర్ ఐడీ పొందాలని ఆమె కోరారు.