హైదరాబాద్లో మైక్రోసాఫ్ట్ 4వ క్లౌడ్ రీజియన్ ప్రారంభం
ఏఐ, డేటా సెంటర్ల విస్తరణకు భారీ పెట్టుబడులు
సూర్య బిజినెస్ డెస్క్: దేశంలో డేటా సెంటర్ల సామర్థ్యాన్ని పెంపొందించడంతో పాటు ఎంటర్ప్రైజ్ ఏఐ (ఆర్టిఫిషియల్ ఇంటెలిజెన్స్) వినియోగాన్ని మరింత వేగవంతం చేసే దిశగా మైక్రోసాఫ్ట్ సంస్థ సరికొత్త అడుగు వేసింది. తన క్లౌడ్ మరియు ఏఐ మౌలిక సదుపాయాలను విస్తరిస్తూ హైదరాబాద్ వేదికగా దేశంలోనే తన నాలుగో క్లౌడ్ రీజియన్ను అధికారికంగా ప్రారంభించింది. 'ఇండియా సౌత్ సెంట్రల్' పేరుతో అందుబాటులోకి వచ్చిన ఈ కొత్త క్లౌడ్ రీజియన్, గతంలో ఉన్న పూణే, చెన్నై, ముంబై క్లౌడ్ రీజియన్లతో జతకూరింది. దీనితో భారతదేశంలోనే అత్యంత భారీ హైపర్స్కేల్ క్లౌడ్ మౌలిక సదుపాయాలు కలిగిన ఏకైక టెక్నాలజీ దిగ్గజంగా మైక్రోసాఫ్ట్ తన స్థానాన్ని మరింత సుస్థిరం చేసుకుంది.
భారతదేశంలో క్లౌడ్ సామర్థ్యాలను మెరుగుపరచడం, ఏఐ మౌలిక వసతులను బలోపేతం చేయడం, నైపుణ్యాభివృద్ధి కార్యక్రమాలు మరియు వ్యాపార విస్తరణను వేగవంతం చేయడమే లక్ష్యంగా మైక్రోసాఫ్ట్ గతంలో ప్రకటించిన 20.5 బిలియన్ డాలర్ల (సుమారు రూ. 1.7 లక్షల కోట్లకు పైగా) భారీ పెట్టుబడి నిబద్ధతలో భాగంగానే ఈ ప్రాజెక్ట్ రూపుదిద్దుకుంది. ఈ ప్రారంభోత్సవ కార్యక్రమంలో మైక్రోసాఫ్ట్ ఇండియా మరియు సౌత్ ఏషియా ప్రెసిడెంట్ పునీత్ చందోక్ పాల్గొని మాట్లాడారు. భారతదేశం ప్రస్తుతం డిజిటల్ పరివర్తనలో అత్యంత కీలకమైన దశలో ఉంటూ, ప్రపంచంలోనే అత్యధికంగా డేటాను ఉత్పత్తి చేస్తున్న ప్రధాన దేశాల్లో ఒకటిగా అవతరించిందని ఈ సందర్భంగా ఆయన స్పష్టం చేశారు.
ప్రస్తుతం ప్రపంచవ్యాప్తంగా ఉత్పత్తి అవుతున్న మొత్తం డేటాలో భారతదేశ వాటా దాదాపు 20 శాతంగా ఉందని, అయితే దానికి తగ్గట్టుగా ప్రపంచ డేటా సెంటర్ సామర్థ్యంలో మన దేశ వాటా కేవలం 3 శాతం మాత్రమే ఉందన చందోక్ వివరించారు. ఈ వ్యత్యాసమే రాబోయే దశాబ్ద కాలంలో భారతదేశానికి లభించే అతిపెద్ద వ్యాపార మరియు సాంకేతిక అవకాశమని ఆయన అభిప్రాయపడ్డారు. ప్రస్తుతం భారతదేశంలో ఉన్న డేటా సెంటర్ల సామర్థ్యం సుమారు 2 గిగావాట్లు (GW) కాగా, వివిధ పరిశ్రమలు, ప్రభుత్వ రంగాలు మరియు ప్రైవేట్ సంస్థలు ఏఐ అప్లికేషన్లను భారీ స్థాయిలో ఉపయోగించడం ప్రారంభించడంతో 2035 నాటికి ఇది 12 నుండి 14 గిగావాట్లకు చేరుకుంటుందని అంచనా వేశారు.
భారతదేశంలో ఆర్టిఫిషియల్ ఇంటెలిజెన్స్ ఆధారిత సేవలకు ఇప్పటికే అత్యంత బలమైన డిమాండ్ ఉందని, పెరుగుతున్న డిమాండ్కు అనుగుణంగా మౌలిక సదుపాయాలను వేగంగా నిర్మించడమే ఇప్పుడు మన ముందున్న ప్రధాన సవాలని చందోక్ వ్యాఖ్యానించారు. మనం నిర్మిస్తున్న డిజిటల్ పురోగతికి తగిన విధంగా భౌతిక మౌలిక వసతుల కల్పన జరగడం అనేది కేవలం ఒక సంస్థ అవసరం మాత్రమే కాదని, అది జాతీయ ఆవశ్యకత అని ఆయన ఉద్ఘాటించారు. హైదరాబాద్లో ప్రారంభమైన ఈ కొత్త క్లౌడ్ రీజియన్ ద్వారా రాబోయే రోజుల్లో దేశీయంగా వేలాది ఉద్యోగావకాశాలు పెరగడమే కాకుండా, విదేశీ పెట్టుబడులను ఆకర్షించడంలో తెలంగాణ మరియు భారత సాంకేతిక రంగాలు ముందంజలో ఉంటాయని నిపుణులు భావిస్తున్నారు.
