పెట్రోల్ పంపుల్లో రూ. 2000 మించితే యూపీఐ చెల్లింపులు నిలిపివేత: యజమానుల సంచలన నిర్ణయం

సూర్య బిజినెస్ డెస్క్: డిజిటల్ చెల్లింపులు ఎక్కువగా జరిగే పెట్రోల్ బంకుల్లో త్వరలోనే ఒక పెద్ద మార్పు రాబోతోంది. యూపీఐ ద్వారా రూ. 2,000 కంటే ఎక్కువ విలువైన చెల్లింపులను ఇకపై స్వీకరించకూడదని దేశవ్యాప్తంగా ఉన్న పెట్రోల్ పంపు యజమానులు నిర్ణయం తీసుకున్నారు. అక్టోబర్ 15 నుంచి వాణిజ్య యూపీఐ లావాదేవీలపై నూతనంగా విధించనున్న మర్చంట్ డిస్కౌంట్ రేట్ ఛార్జీలను నిరసిస్తూ పెట్రోల్ డీలర్లు ఈ నిర్ణయం దిశగా అడుగులు వేస్తున్నారు.

వాణిజ్య ఉపయోగాల కోసం చేసే పెద్ద లావాదేవీలపై మళ్లీ ఎండీఆర్ విధానాన్ని పునరుద్ధరించాలని నిర్ణయించడం పంపు యజమానుల్లో తీవ్ర అసంతృప్తిని నింపింది. జీఎస్టీతో కలిపి బ్యాంకులు సుమారు 0.47 శాతం వరకు రుసుము వసూలు చేయడానికి సన్నాహాలు చేస్తున్నాయి. రూ. 2,000 దాటిన ప్రతి లావాదేవీపై పడే అదనపు భారాన్ని భరించడం తమకు సాధ్యం కాదని, బంకుల్లో యూపీఐపై ఎండీఆర్ చార్జీలను పూర్తిగా రద్దు చేయాలని డీలర్లు గట్టిగా డిమాండ్ చేస్తున్నారు.

ఒకవేళ ఈ నిబంధన అమల్లోకి వస్తే సుదూర ప్రాంతాలకు ప్రయాణించే లారీలు, గూడ్స్ వాహన చోదకులు తీవ్ర ఇబ్బందులను ఎదుర్కోవాల్సి వస్తుంది. వేల రూపాయల చెల్లింపులు చేసే వాహనదారులు నగదు రూపంలోనే చెల్లించాల్సి రావడం వల్ల ప్రయాణాల్లో నగదును భద్రపరుచుకోవడం సవాలుగా మారే ప్రమాదం ఉంది. ఈ నిర్ణయంతో డిజిటల్ చెల్లింపుల విధానానికి ప్రతిబంధకాలు ఏర్పడటంతో పాటు సామాన్య వినియోగదారులపై ప్రతికూల ప్రభావం పడే అవకాశం ఉండటంతో కేంద్ర ప్రభుత్వం ఇందులో జోక్యం చేసుకోవాలని కోరుతున్నారు.