వ్యవసాయ కుంటల నిర్మాణంతో రైతులకు మేలు

సూర్య వాంకిడి, : వర్షపు నీటిని సంరక్షించుకోవడం ద్వారా వ్యవసాయానికి మేలు చేకూరుతుందని జిల్లా గ్రామీణాభివృద్ధి అధికారి బానోత్ దత్తారాం అన్నారు. శుక్రవారం వాంకిడి మండలంలోని గొయెగావ్‌ గ్రామపంచాయతీ పరిధిలో నిర్మిస్తున్న వ్యవసాయ కుంటల పనులను ఆయన పరిశీలించారు. నిర్మాణ పనుల పురోగతిని అధికారులను అడిగి తెలుసుకున్నారు.
ఈ సందర్భంగా ఆయన మాట్లాడుతూ ఎల్‌నినో ప్రభావంతో వర్షాభావ పరిస్థితులు ఏర్పడే అవకాశాలు ఉన్నందున రైతుల పొలాల్లో నీటి సంరక్షణ పనులను విస్తృతంగా చేపట్టాలని సూచించారు. వ్యవసాయ కుంటల ద్వారా వర్షపు నీటిని నిల్వ చేసుకుని పంటలకు అవసరమైన సమయంలో వినియోగించుకోవచ్చన్నారు. తద్వారా పంటల దిగుబడులను పెంచుకునే అవకాశం ఉంటుందని తెలిపారు. ఈ పనుల వల్ల గ్రామాల్లో శాశ్వత ఆస్తులు ఏర్పడటంతోపాటు పేద కూలీలకు ఉపాధి లభిస్తుందని పేర్కొన్నారు. ఉపాధి హామీ పథకంలో జాబ్‌ కార్డులు కలిగిన వారంతా అందుబాటులో ఉన్న పనులను సద్వినియోగం చేసుకోవాలని కోరారు.అనంతరం వాంకిడి గ్రామపంచాయతీలో పింఛన్ల కోసం దరఖాస్తు చేసుకున్న లబ్ధిదారుల అర్హతలను పరిశీలించి, వారి వివరాలను ధ్రువీకరించారు.తదుపరి మండల పరిషత్‌ కార్యాలయానికి వివిధ పనుల నిమిత్తం వచ్చే ప్రజల సౌకర్యార్థం రూ.3 లక్షల వ్యయంతో నిర్మించనున్న సామూహిక మరుగుదొడ్లకు స్థానిక సర్పంచ్‌, ఉపసర్పంచ్‌లతో కలిసి భూమిపూజ నిర్వహించారు.ఈ కార్యక్రమంలో మండల పరిషత్‌ అభివృద్ధి అధికారి పాటిల్‌ జ్యోత్స్న, ఇంజినీరింగ్‌ అధికారి మోసిన్‌ బిన్‌ అహ్మద్‌, సాంకేతిక సహాయకులు, పంచాయతీ కార్యదర్శులు తదితరులు పాల్గొన్నారు.