విద్యుత్ కోతలతో రైతుల అవస్థలు ... రాజంపేటలో రైతుల ధర్నా..

సూర్య రాజంపేట;వ్యవసాయానికి నిరంతర విద్యుత్ సరఫరా చేయాలని డిమాండ్ చేస్తూ రాజంపేట మండల కేంద్రంలో రైతులు ధర్నా నిర్వహించారు. వ్యవసాయానికి రోజుకు కేవలం ఆరు గంటల విద్యుత్ మాత్రమే సరఫరా అవుతుండటంతో పంటలకు నీరందించలేక తీవ్ర ఇబ్బందులు ఎదుర్కొంటున్నామని రైతులు ఆవేదన వ్యక్తం చేశారు.
ఈ సందర్భంగా రైతు సంఘం నాయకుడు చింతల స్వామి మాట్లాడుతూ.. విద్యుత్ సరఫరాలో తరచూ అంతరాయాలు ఏర్పడటంతో రైతులు అనేక సమస్యలు ఎదుర్కొంటున్నారని తెలిపారు. సక్రమంగా విద్యుత్ అందకపోవడంతో బోరు మోటార్లు కాలిపోతున్నాయని, పంటలకు అవసరమైన సమయంలో నీరు అందించలేకపోతున్నామని పేర్కొన్నారు. దీంతో పంటలు ఎండిపోయే ప్రమాదం ఉందని, రైతులు పెట్టిన పెట్టుబడులు నష్టపోయే పరిస్థితి ఏర్పడుతోందని ఆందోళన వ్యక్తం చేశారు.
రైతులు ఇప్పటికే వ్యవసాయ పెట్టుబడుల భారంతో ఇబ్బందులు పడుతున్నారని, ఇలాంటి పరిస్థితుల్లో విద్యుత్ కోతలు మరింత నష్టాన్ని కలిగిస్తున్నాయని అన్నారు. పంటలకు సకాలంలో నీరందించాలంటే నిరంతర విద్యుత్ సరఫరా ఎంతో అవసరమని పేర్కొన్నారు.ప్రభుత్వం వెంటనే స్పందించి వ్యవసాయానికి 24 గంటల నాణ్యమైన విద్యుత్ సరఫరా చేయాలని చింతల స్వామి డిమాండ్ చేశారు. రైతుల సమస్యలను పరిష్కరించి పంటలను కాపాడేందుకు అధికారులు చర్యలు తీసుకోవాలని కోరారు. ఈ సందర్భంగా రైతులు ప్రభుత్వానికి వ్యతిరేకంగా నినాదాలు చేస్తూ తమ నిరసనను వ్యక్తం చేశారు. అక్కడికి చేరుకున్నా ఏఈకి నాందేవ్ మరియు రైతులకు కరెంటు ఎక్కడ ఇస్తున్నారని ప్రశ్నించడంతో ఉద్రిక్తత నెలకొంది