సంతానానికి భారం కావద్దని తండ్రి ఆత్మహత్య...

మేజర్ న్యూస్, షాద్ నగర్ :కొడుకులకు తాను భారం కాకూడదనే మనస్తాపంతో ఓ వృద్ధ తండ్రి రైలు కింద పడి ఆత్మహత్య చేసుకున్న విషాద సంఘటన షాద్ నగర్ రైల్వే పోలీస్ స్టేషన్ పరిధిలో చోటుచేసుకుంది. రైల్వే హెడ్ కానిస్టేబుల్ డి. మల్లేశ్వర్ తెలిపిన వివరాల ప్రకారం... రంగారెడ్డి జిల్లా కేశంపేట్ మండలం నిడదవెళ్లి గ్రామానికి చెందిన కమ్మరి పాండయ్య (59) గత 25 ఏళ్లుగా నందిగామ గ్రామంలో వడ్రంగి పని చేస్తూ జీవిస్తున్నాడు. మృతుడికి ఇద్దరు కుమారులు, ఒక కుమార్తె ఉన్నారు. రెండేళ్ల క్రితం భార్య చనిపోవడంతో పాండయ్య ఒంటరివాడయ్యాడు. దీనికి తోడు గత కొంతకాలంగా తీవ్రమైన కాలు నొప్పితో బాధపడుతుండటంతో ఆయన తీవ్ర మానసిక వేదనకు గురయ్యాడు. వృద్ధాప్యం, అనారోగ్యం కారణంగా తన వల్ల కొడుకులు ఇబ్బంది పడకూడదనే బాధతో పాండయ్య ఈరోజు సోమవారం తెల్లవారుజామున 3:00 గంటల ప్రాంతంలో నందిగామ రైల్వే బ్రిడ్జి వద్దకు వెళ్లి, వేగంగా వస్తున్న రైలు కింద పడి బలవన్మరణానికి పాల్పడ్డాడు. ఉదయం రైల్వే ట్రాక్‌పై మృతదేహాన్ని గమనించిన స్టేషన్ మాస్టర్ వెంకట్రావు వెంటనే రైల్వే పోలీసులకు సమాచారం అందించారు. ఆయన ఫిర్యాదు మేరకు హెడ్ కానిస్టేబుల్ డి. మల్లేశ్వర్ కేసు నమోదు చేసి దర్యాప్తు చేపట్టారు. శవాన్ని పోస్టుమార్టం నిమిత్తం షాద్‌నగర్ ప్రభుత్వ ఆసుపత్రికి తరలించారు. 25 ఏళ్లుగా గ్రామంలో అందరితో కలుపుగోలుగా ఉండే పాండయ్య ఆత్మహత్య చేసుకోవడంతో  గ్రామంలో విషాద ఛాయలు అలుముకున్నాయి..

రాఘవేందర్ గౌడ్: మేజర్ న్యూస్, షాద్ నగర్