శాస్త్రీయ దృక్పథంతోనే సమాజాభివృద్ధి మూఢనమ్మకాలను వీడి శాస్త్రీయ ఆలోచనలు అలవర్చుకోవాలి: ఏ. రవి

భీమవరం, సూర్య న్యూస్: సమాజాభివృద్ధికి శాస్త్రీయ దృక్పథం ఎంతో అవసరమని, ప్రతి ఒక్కరూ మూఢనమ్మకాలను వీడి శాస్త్రీయ ఆలోచనలను అలవర్చుకోవాలని వ్యవసాయ కార్మిక సంఘం రాష్ట్ర నాయకులు ఏ. రవి పిలుపునిచ్చారు. భీమవరంలోని భవన నిర్మాణ కార్మికుల భవనంలో మంగళవారం అంగన్‌వాడీ కార్యకర్తల జిల్లా విద్యా వైజ్ఞానిక తరగతులు ప్రారంభమయ్యాయి.శాస్త్రీయ ఆలోచన’ అంశంపై ఏ. రవి మాట్లాడుతూ.. ప్రజల్లో నెలకొన్న అభద్రతాభావాన్ని ఆసరాగా చేసుకుని కొందరు స్వార్థపరులు మూఢనమ్మకాలను పెంచి రాజకీయ ప్రయోజనాలకు ఉపయోగించుకుంటున్నారని విమర్శించారు. శాస్త్రీయ దృక్పథం మనుషుల్లో బాధ్యత, కష్టపడే తత్వాన్ని పెంపొందించి సన్మార్గంలో నడిపిస్తుందని పేర్కొన్నారు.అనంతరం ‘నయా ఉదారవాద విధానాలు–కార్మికులపై ప్రభావం’ అనే అంశంపై సీఐటీయూ రాష్ట్ర ఉపాధ్యక్షులు కే. రాజా రామ్మోహన్ రాయ్ మాట్లాడుతూ.. సరళీకరణ, ప్రైవేటీకరణ, ప్రపంచీకరణ విధానాలతో కార్మికుల ఉద్యోగ భద్రత, సంక్షేమం దెబ్బతింటున్నాయని ఆందోళన వ్యక్తం చేశారు. కనీస వేతనాలు, ప్రాథమిక సౌకర్యాలు కల్పించడంలో కార్మికులు అనేక సమస్యలు ఎదుర్కొంటున్నారని తెలిపారు. కార్మిక హక్కుల పరిరక్షణకు శ్రామిక వర్గమంతా ఐక్యంగా పోరాడాలని పిలుపునిచ్చారు.ఈ తరగతులకు అంగన్‌వాడీ జిల్లా నాయకురాలు ఎండీ. హసీనా ప్రిన్సిపాల్‌గా వ్యవహరించారు. సీఐటీయూ జిల్లా ప్రధాన కార్యదర్శి కే. వాసుదేవరావు, అంగన్‌వాడీ జిల్లా అధ్యక్ష, కార్యదర్శులు కే. ఝాన్సీ లక్ష్మి, డి. కళ్యాణి, కే. తులసితో పాటు పలువురు నాయకులు, కార్యకర్తలు పాల్గొన్నారు.

 రిపోర్టర్ శ్రీనివాస్ భీమవరం పశ్చిమగోదావరి జిల్లా