ప్రజావాణికి ఆదరణ కరువు...!

మోమిన్‌పేట్,మేజర్ న్యూస్ (సెప్టెంబర్ 28):ప్రజల సమస్యలను నేరుగా అధికారుల దృష్టికి తీసుకెళ్లి పరిష్కరించేందుకు ప్రతి సోమవారం నిర్వహిస్తున్న మండల స్థాయి ప్రజావాణి కార్యక్రమానికి క్రమంగా ప్రజల నుంచి ఆదరణ తగ్గుతోంది. మోమిన్‌పేట్ ఎంపీడీవో కార్యాలయంలో ఎంపీడీవో సృజన సాహిత్య ఆధ్వర్యంలో సోమవారం నిర్వహించిన ప్రజావాణికి ఒక్క ఫిర్యాదు కూడా అందకపోవడంతో అధికారులు బోసిపోయి కూర్చోవాల్సిన పరిస్థితి నెలకొంది.గత నెల నుంచి ఎంపీడీవో కార్యాలయంలో మండల స్థాయి ప్రజావాణి కార్యక్రమాన్ని ప్రారంభించిన విషయం తెలిసిందే. ప్రజలు తమ సమస్యలను అధికారులకు నేరుగా విన్నవించుకునేందుకు ఈ కార్యక్రమాన్ని ఏర్పాటు చేసినప్పటికీ, ప్రతి వారం ఫిర్యాదుల సంఖ్య తగ్గుతుండటం చర్చనీయాంశంగా మారింది. ప్రజావాణి నిర్వహిస్తున్న విషయం ప్రజలకు పూర్తిస్థాయిలో తెలియకపోవడం వల్లే స్పందన తగ్గిందా? లేక ప్రజల్లో ఈ కార్యక్రమంపై ఆసక్తి లేకపోవడమే కారణమా? అనే ప్రశ్నలు తలెత్తుతున్నాయి.మరోవైపు ప్రజావాణి కార్యక్రమంపై గ్రామీణ ప్రాంత ప్రజలకు మరింత అవగాహన కల్పించాల్సిన అవసరం ఉందని పలువురు అభిప్రాయపడుతున్నారు. ప్రతి సోమవారం ఎంపీడీవో కార్యాలయంలో ప్రజావాణి నిర్వహిస్తున్న విషయాన్ని గ్రామాల్లో విస్తృతంగా ప్రచారం చేస్తే ప్రజలు తమ సమస్యలను అధికారుల దృష్టికి తీసుకువచ్చే అవకాశం ఉంటుందని పేర్కొంటున్నారు.ప్రజల సమస్యల పరిష్కారమే లక్ష్యంగా మండల స్థాయి ప్రజావాణిని నిర్వహిస్తున్నామని అధికారులు తెలిపారు. ప్రజలు ఈ అవకాశాన్ని సద్వినియోగం చేసుకుని తమ సమస్యలను అధికారుల దృష్టికి తీసుకురావాలని సూచించారు.రిపోర్టర్ మాణిక్య చారి.