పూల పండుగతో పులకించిన మందమర్రి కోర్టు ప్రాంగణం

సూర్య, మందమర్రి.:తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ మహిళల ఆత్మగౌరవానికి, ఐక్యతకు, ప్రకృతితో మానవ జీవనానికి ఉన్న అనుబంధానికి నిదర్శనమని మందమర్రి కోర్టు ఇన్‌చార్జి న్యాయమూర్తి నిరోషా అన్నారు. పట్టణంలోని కోర్టు ప్రాంగణంలో నిర్వహించిన ఏడో రోజు వేపకాయల బతుకమ్మ వేడుకల్లో ఆమె పాల్గొన్నారు. వివిధ రకాల రంగురంగుల పూలతో పేర్చిన బతుకమ్మలు కోర్టు ప్రాంగణానికి ప్రత్యేక ఆకర్షణగా నిలిచాయి. సంప్రదాయ దుస్తుల్లో మహిళలు బతుకమ్మల చుట్టూ చేరి పాటలు పాడుతూ, ఆటపాటలతో సందడి చేశారు. పూల పరిమళాలు, బతుకమ్మ పాటలతో కోర్టు ప్రాంగణమంతా పండుగ శోభను సంతరించుకుంది. ఈ సందర్భంగా న్యాయమూర్తి నిరోషా మాట్లాడుతూ.. బతుకమ్మ పండుగ కేవలం పూలను పూజించే వేడుక మాత్రమే కాదని, తెలంగాణ ఆడపడుచుల ఆత్మీయతకు, కుటుంబ అనుబంధాలకు, సామాజిక ఐక్యతకు ప్రతీకగా నిలుస్తుందని పేర్కొన్నారు. ప్రకృతిలో లభించే పూలతో బతుకమ్మను పేర్చి పూజించడం ద్వారా ప్రకృతి పట్ల కృతజ్ఞతను చాటుకుంటామని తెలిపారు. ఇటువంటి సాంస్కృతిక వేడుకలు పరస్పర గౌరవం, సోదరభావాన్ని పెంపొందించడంతోపాటు తెలంగాణ సంస్కృతి, సంప్రదాయాలను భావితరాలకు అందించడంలో కీలక పాత్ర పోషిస్తాయని అన్నారు. ప్రతి ఇంటా సుఖసంతోషాలు, ఆయురారోగ్యాలు, సిరిసంపదలు వెల్లివిరియాలని ఆకాంక్షిస్తూ ప్రజలకు బతుకమ్మ పండుగ శుభాకాంక్షలు తెలిపారు. ఈ కార్యక్రమంలో మహిళా న్యాయవాదులు సమత, సుమలత, ప్రసన్న, పల్లవి, మౌనిక, రజితతో పాటు మందమర్రి బార్‌ ప్రెసిడెంట్‌ చిరంజీవి, న్యాయవాదులు మేకల రామన్న, కట్ల శ్రీనివాస్‌, అశోక్‌, జి. రవి, ఆర్. రాములు, సెల్వరాజ్‌, లక్ష్మణ్‌, మధుకర్‌, ఏ. సత్యనారాయణ, వడ్లకొండ రంజిత్‌ గౌడ్‌ తదితరులు పాల్గొన్నారు.