పూల పండుగలో పాల్గొన్న మహిళలు.. పాటలు, ఆటలతో సందడి

పెద్ద శంకరంపేట, : పెద్ద శంకరంపేటతో పాటు మండల పరిధిలోని వివిధ గ్రామాల్లో ఆదివారం సద్దుల బతుకమ్మ వేడుకలను మహిళలు ఘనంగా జరుపుకున్నారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సందర్భంగా మహిళలు వివిధ రకాల రంగురంగుల పూలతో బతుకమ్మలను సర్వాంగసుందరంగా పేర్చి పండుగ శోభను చాటుకున్నారు.గ్రామాల్లోని ప్రధాన కూడళ్లలో బతుకమ్మలను ఏర్పాటు చేసి, సంప్రదాయ బతుకమ్మ పాటలు పాడుతూ, కోలాటాలు ఆడుతూ ఉత్సాహంగా సంబరాలు చేసుకున్నారు. మహిళల ఆటపాటలతో గ్రామాల్లో పండుగ వాతావరణం నెలకొంది.అనంతరం పెద్ద శంకరంపేటలోని బతుకమ్మ కుంటతో పాటు తిరుమలాపూర్ చెరువు, ఇతర గ్రామాల్లోని సమీప చెరువుల్లో బతుకమ్మలను నిమజ్జనం చేశారు. మహిళలు సంప్రదాయబద్ధంగా పూజలు నిర్వహించి, సుఖసంతోషాలు, ఆయురారోగ్యాలు కలగాలని అమ్మవారిని ప్రార్థించారు.తెలంగాణ ఆడపడుచుల ఆత్మీయతకు, ప్రకృతితో మమేకమైన సంస్కృతికి ప్రతీకగా నిలిచే సద్దుల బతుకమ్మ వేడుకలు మండలవ్యాప్తంగా భక్తిశ్రద్ధలతో, ఆనందోత్సాహాల మధ్య ముగిశాయి.