పాశమైలారంలో పూల పండుగకు పండుగ శోభ.! -చైర్మన్ మోటే సుమలత శ్రీకాంత్ ఆధ్వర్యంలో అంగరంగ వైభవంగా బతుకమ్మ సంబరాలు

పటాన్‌చెరు, తెలంగాణ సంస్కృతి, సంప్రదాయాల వైభవాన్ని చాటిచెప్పే బతుకమ్మ సంబరాలు పాశమైలారంలో అంబరాన్నంటాయి. ఇస్నాపూర్ మున్సిపాలిటీ పరిధిలోని పాశమైలారం గ్రామంలో మున్సిపల్ చైర్మన్ మోటే సుమలత శ్రీకాంత్ ఆధ్వర్యంలో బతుకమ్మ వేడుకలను అంగరంగ వైభవంగా నిర్వహించారు. పూలతో పేర్చిన బతుకమ్మలు, సంప్రదాయ పాటలు, ఆడపడుచుల ఆటపాటలతో గ్రామమంతా పండుగ శోభను సంతరించుకుంది. వేడుకల నిర్వహణకు చేసిన ఏర్పాట్లు మహిళలను ఆకట్టుకున్నాయి.

పూల బతుకమ్మలతో ప్రత్యేక ఆకర్షణ

బతుకమ్మ పండుగను పురస్కరించుకుని మహిళలు, యువతులు వివిధ రకాల రంగురంగుల పూలతో బతుకమ్మలను అందంగా అలంకరించి వేడుకలకు తరలివచ్చారు. సంప్రదాయబద్ధంగా పూజలు నిర్వహించిన అనంతరం బతుకమ్మల చుట్టూ చేరి పాటలు పాడుతూ ఉత్సాహంగా ఆడిపాడారు. సింగర్ ఆలపించిన బతుకమ్మ పాటలు వేడుకల్లో మరింత జోష్ నింపాయి. సంప్రదాయ దుస్తుల్లో మహిళలు పెద్ద సంఖ్యలో పాల్గొనడంతో పాశమైలారంలో పూల పండుగ సందడి నెలకొంది.

ఆడపడుచుల ఆత్మగౌరవానికి ప్రతీక బతుకమ్మ

ఈ సందర్భంగా మున్సిపల్ చైర్మన్ మోటే సుమలత శ్రీకాంత్ మాట్లాడుతూ, బతుకమ్మ పండుగ తెలంగాణ ఆడపడుచుల ఆత్మగౌరవానికి, సంస్కృతి సంప్రదాయాలకు ప్రతీక అని అన్నారు. ప్రకృతిని పూజిస్తూ, పూలను ఆరాధిస్తూ జరుపుకునే ఈ పండుగ ప్రతి ఒక్కరిలో ఆనందాన్ని, ఆత్మీయతను నింపుతుందని పేర్కొన్నారు. తెలంగాణ సంస్కృతి, సంప్రదాయాలను కాపాడుకుంటూ భావితరాలకు అందించాల్సిన బాధ్యత ప్రతి ఒక్కరిపై ఉందన్నారు.మహిళలందరూ ఐకమత్యంతో బతుకమ్మ వేడుకల్లో పాల్గొని ఆనందోత్సాహాల మధ్య పండుగను జరుపుకోవడం సంతోషంగా ఉందని ఆమె తెలిపారు. ఇలాంటి సాంస్కృతిక వేడుకలు ప్రజల మధ్య ఐక్యతను, సోదరభావాన్ని మరింత పెంపొందిస్తాయని పేర్కొన్నారు. తెలంగాణ సంప్రదాయాల పరిరక్షణకు ప్రతి ఒక్కరూ కృషి చేయాలని పిలుపునిచ్చారు.

ఘనంగా వేడుకలు.. పెద్ద సంఖ్యలో పాల్గొన్న ప్రముఖులు

చైర్మన్ మోటే సుమలత శ్రీకాంత్ ఆధ్వర్యంలో నిర్వహించిన బతుకమ్మ సంబరాల్లో మహిళలు, యువతులు ఉత్సాహంగా పాల్గొని వేడుకలను విజయవంతం చేశారు. పాశమైలారంలో పండుగ వాతావరణం నెలకొనగా, ఆటపాటలు అందరినీ ఆకట్టుకున్నాయి.ఈ కార్యక్రమంలో బీఆర్ఎస్ కోఆర్డినేటర్ ఆదర్శ్ రెడ్డి, మాజీ జడ్పీటీసీ గడిల శ్రీకాంత్ గౌడ్, మున్సిపల్ కమిషనర్ వెంకట కిషన్ రావు, కౌన్సిలర్లు, సీనియర్ నాయకులు, గ్రామ పెద్దలు, మహిళలు, యువతులు, స్థానిక ప్రజలు పాల్గొన్నారు.