కెల్లెడులో నయనానందకరంగా ‘లలితా దీపోత్సవం’
సూర్య - మానకొండూర్, మండలంలోని కెల్లెడు గ్రామంలో దేవీ శరన్నవరాత్రి మహోత్సవాలు అత్యంత ఆధ్యాత్మిక వాతావరణంలో సాగుతున్నాయి. ఉత్సవాల్లో భాగంగా ఐదో రోజు గురువారం రాత్రి గ్రామంలో నిర్వహించిన "లలితా దీపోత్సవం" కార్యక్రమం కన్నులపండువగా సాగింది. గ్రామ సర్పంచ్ ఆడెపు రజిత-విజయ్ ఆధ్వర్యంలో గ్రామంలోని మహిళలు పెద్ద సంఖ్యలో తరలివచ్చి ఈ దివ్య దీపారాధన మహోత్సవంలో పాలుపంచుకున్నారు.
నవరాత్రుల్లో ఐదవ రోజున సకల సౌభాగ్య ప్రదాయిని అయిన శ్రీ లలితా త్రిపుర సుందరి దేవిని పూజించడం సంప్రదాయం. ఈ సందర్భంగా మహిళలు తమ స్వహస్తాలతో బియ్యపు పిండి, నువ్వుల నూనెతో పవిత్రమైన పిండి ప్రమిదలను సిద్ధం చేశారు. వీటన్నింటినీ అమ్మవారి ముందట చేర్చి, ఏకకాలంలో ఒకే పెద్ద హోమ రూపంలో వెలిగించారు. ఈ విధంగా పిండి దీపాలను హోమ స్వరూపంలో వీక్షించడం వల్ల జాతకంలోని గ్రహ దోషాలు, పీడలు తొలగిపోతాయని భక్తుల నమ్మకం. ముఖ్యంగా కుటుంబంలో ఆర్థిక ఇబ్బందులు నశించి, ఆయురారోగ్యాలు, అష్టైశ్వర్యాలు, సకల మనోవాంఛలు సిద్ధిస్తాయని వేద పండితులు తెలిపారు. మహిళలు భక్తి శ్రద్ధలతో దీపాలను వెలిగించడంతో ఆ ప్రాంతమంతా ఆధ్యాత్మిక శోభతో మెరిసిపోయింది. ఈ కార్యక్రమంలో ఉత్సవ కమిటీ నిర్వాహకులు, భక్తులు అధిక సంఖ్యలో పాల్గొని అమ్మవారిని దర్శించుకున్నారు.
