జూబ్లీహిల్స్‌ చెక్‌పోస్ట్‌–ఎన్‌ఎఫ్‌సీఎల్‌ జంక్షన్‌ మధ్య ₹1,090 కోట్లతో స్టీల్‌ ఫ్లైఓవర్‌
హైదరాబాద్ మేజర్ న్యూస్ (సిటీ ప్రతినిధి):హైదరాబాద్ నగరంలో ట్రాఫిక్‌ రద్దీని తగ్గించి, వాహనాల రాకపోకలను మరింత సులభతరం చేసే లక్ష్యంతో చేపట్టిన జూబ్లీహిల్స్‌ చెక్‌పోస్ట్‌–ఎన్‌ఎఫ్‌సీఎల్‌ జంక్షన్‌ స్టీల్‌ ఫ్లైఓవర్‌ కారిడార్‌ నిర్మాణ పనులను జీహెచ్‌ఎంసీ అధికారులు వేగవంతం చేస్తున్నారు. సుమారు ₹1,090 కోట్ల వ్యయంతో ప్రతిపాదించిన 4.3 కిలోమీటర్ల పొడవైన ఆరు లేన్ల ద్విదిశాత్మక ఎలివేటెడ్‌ కారిడార్‌ పనుల పురోగతిని జీహెచ్‌ఎంసీ కమిషనర్‌ ఆర్‌.వి. కర్ణన్‌ గురువారం క్షేత్రస్థాయిలో పరిశీలించారు.
ఖైరతాబాద్‌ జోనల్‌ కమిషనర్‌ బి. సంతోష్‌, జీహెచ్‌ఎంసీ ఇంజినీరింగ్‌ విభాగం అధికారులతో కలిసి కారిడార్‌ మార్గాన్ని తనిఖీ చేసిన కమిషనర్‌.. పునాదుల తవ్వకాలు, జంక్షన్ల అభివృద్ధి పనుల పురోగతిని సమీక్షించారు. నిర్మాణ పనుల సమయంలో ట్రాఫిక్‌ ప్రవాహానికి అంతరాయం కలగకుండా తగిన చర్యలు చేపట్టాలని, వాహనదారులు, ప్రయాణికులకు అసౌకర్యం కలగకుండా ముందస్తు ప్రణాళికతో వ్యవహరించాలని అధికారులను ఆదేశించారు.
జంక్షన్ల అభివృద్ధి పనులు వేగవంతం చేయాలి
కేబీఆర్‌ పార్క్‌ పరిసరాల్లో ట్రాఫిక్‌ రాకపోకలను క్రమబద్ధీకరించేందుకు కీలకమైన జంక్షన్ల అభివృద్ధి పనులను వేగవంతం చేయాలని కమిషనర్‌ సూచించారు. కేబీఆర్‌ పార్క్‌ ప్రధాన ప్రవేశ ద్వారం వద్ద, అగర్సేన్‌ జంక్షన్‌, జూబ్లీహిల్స్‌ చెక్‌పోస్ట్‌ జంక్షన్‌ వద్ద పనులను ప్రాధాన్య క్రమంలో పూర్తి చేయాలని ఆదేశించారు. ఈ చర్యలతో పార్క్‌ పరిసరాల్లో ట్రాఫిక్‌ ప్రవాహం మెరుగుపడటంతో పాటు వాహనాల రద్దీని నియంత్రించేందుకు అవకాశం ఉంటుందని పేర్కొన్నారు.
పునాదుల నిర్మాణానికి జియోటెక్నికల్‌ పరిశోధనలు
ముగ్ధ జంక్షన్‌ నుంచి ఎన్‌ఎఫ్‌సీఎల్‌ జంక్షన్‌ వరకు ఉన్న మార్గంలో ఫ్లైఓవర్‌ పునాదుల రూపకల్పనకు అవసరమైన జియోటెక్నికల్‌ పరిశోధనలను తక్షణమే ప్రారంభించాలని అధికారులను ఆదేశించారు. భూగర్భ పరిస్థితులను అధ్యయనం చేసి, వాటికి అనుగుణంగా పునాదుల రూపకల్పన చేపట్టాలని సూచించారు.
నిర్మాణం, స్టీల్‌ ఫ్యాబ్రికేషన్‌పై ప్రత్యేక దృష్టి
జూబ్లీహిల్స్‌ చెక్‌పోస్ట్‌ నుంచి ముగ్ధ జంక్షన్‌ వరకు పునాదుల తవ్వకం పనులను వేగవంతం చేయడంతో పాటు, మరోవైపు స్టీల్‌ ఫ్లైఓవర్‌కు అవసరమైన నిర్మాణ భాగాల ఆఫ్‌సైట్‌ ఫ్యాబ్రికేషన్‌ పనులను సమాంతరంగా చేపట్టాలని కమిషనర్‌ ఆదేశించారు. నిర్మాణం, ఫ్యాబ్రికేషన్‌ పనుల మధ్య సమన్వయం పెంచి ప్రాజెక్టు పురోగతిని వేగవంతం చేయాలని స్పష్టం చేశారు.
సిగ్నల్‌ రహిత ప్రయాణమే లక్ష్యం
జూబ్లీహిల్స్‌ చెక్‌పోస్ట్‌ నుంచి ఎన్‌ఎఫ్‌సీఎల్‌ జంక్షన్‌ వరకు ఆరు లేన్ల ద్విదిశాత్మక స్టీల్‌ ఫ్లైఓవర్‌ కారిడార్‌ అందుబాటులోకి వస్తే ఈ మార్గంలో వాహనాల రాకపోకలు మరింత సులభతరం కావడానికి అవకాశం ఉంటుంది. కీలక జంక్షన్ల వద్ద ట్రాఫిక్‌ నిర్వహణ మెరుగుపడటంతో పాటు ప్రయాణ సమయం తగ్గించేందుకు, నగరంలోని ప్రధాన రహదారులపై రద్దీని నియంత్రించేందుకు ఈ ప్రాజెక్టు దోహదపడనుంది.
ప్రాజెక్టులోని వివిధ పనులను సమన్వయంతో ముందుకు తీసుకెళ్లి, నిర్మాణ సమయంలో ప్రజలకు ఇబ్బందులు తలెత్తకుండా అవసరమైన చర్యలు చేపట్టాలని జీహెచ్‌ఎంసీ కమిషనర్‌ ఆర్‌.వి. కర్ణన్‌ అధికారులకు దిశానిర్దేశం చేశారు.
