ఐలమ్మ వీర వనిత

*ఆమె స్ఫూర్తి చిరస్మరణీయం*

*మాజీ ఎమ్మెల్యే అంజయ్య యాదవ్*

*ఐలమ్మ జయంతి సందర్భంగా నివాళులు అర్పించిన మాజీ ఎమ్మెల్యే అంజయ్య యాదవ్, బీఆర్ఎస్ శ్రేణులు*

షాద్‌నగర్ పట్టణంలోని ఎంపీడీఓ కార్యాలయ ఆవరణలో ఉన్న వీరవనిత చాకలి ఐలమ్మ విగ్రహానికి జయంతి సందర్భంగా మాజీ ఎమ్మెల్యే అంజయ్య యాదవ్ పూలమాల వేసి ఘనంగా నివాళులు అర్పించారు. ఈ సందర్భంగా అంజయ్య యాదవ్ మాట్లాడుతూ.. అన్యాయాన్ని, అణచివేతను ఎదిరించి హక్కుల కోసం ధైర్యంగా పోరాడిన చాకలి ఐలమ్మ జీవితం తెలంగాణ సమాజానికి స్ఫూర్తిదాయకమని అన్నారు. సాధారణ కుటుంబం నుంచి వచ్చిన ఐలమ్మ తన ఆత్మగౌరవాన్ని కాపాడుకోవడంతో పాటు పేదలు, రైతులు, బడుగు బలహీన వర్గాల హక్కుల కోసం పోరాటం చేసిన ధీరవనితగా చరిత్రలో నిలిచిపోయారని పేర్కొన్నారు. మహిళలు ఆత్మవిశ్వాసంతో ముందుకు సాగేందుకు, సామాజిక న్యాయం కోసం నిలబడేందుకు ఐలమ్మ జీవితం నేటి తరానికి స్ఫూర్తినిస్తుందని అన్నారు. ఆమె ఆశయాలను గుర్తుచేసుకుంటూ సమాజంలో సమానత్వం, ఆత్మగౌరవం, సామాజిక న్యాయం కోసం ప్రతి ఒక్కరూ కృషి చేయాలని పిలుపునిచ్చారు. చాకలి ఐలమ్మకు ఘన నివాళులు అర్పిస్తూ ఆమె పోరాట స్ఫూర్తిని భావితరాలకు అందించాల్సిన బాధ్యత మనందరిపై ఉందని అంజయ్య యాదవ్ అన్నారు. ఈ కార్యక్రమంలో కౌన్సిలర్లు వసంత శ్రీనివాస్, శారద శేఖర్, పిన్నమోని గోపాల్, మాజీ కౌన్సిలర్లు వెంకట్రాం రెడ్డి, కానుగు అంతయ్య, నందకిషోర్, నాయకులు రవి యాదవ్, నందిగామ శ్రీనివాస్, జుట్టు బాలరాజు, శ్రీను, కొండ మల్లేష్, జమాల్ ఖాన్ తదితరులు, రజకసంఘం నాయకులు పాల్గొని నివాళులర్పించారు.

- నరసింహారెడ్డి : ఫరూఖ్ నగర్, మేజర్ న్యూస్