ఆలయ నిధులను ప్రభుత్వ నిధులుగా ప్రచారం చేయడం సరికాదు

ఆలయ నిధులను ప్రభుత్వ నిధులుగా ప్రచారం చేయడం సరికాదు

భక్తులు దాతలు సమకూర్చిన సొమ్మును ప్రభుత్వ నిధులుగా చెప్పడం ప్రజలను తప్పుదోవ పట్టించడమే

దేవాలయాల అభివృద్ధి కోసం భక్తులు దాతలు సమకూర్చిన నిధులను రాష్ట్ర ప్రభుత్వ నిధులుగా ప్రచారం చేసుకోవడం కాంగ్రెస్ నాయకులకు సరికాదని బిజెపి సిద్దిపేట జిల్లా ప్రధాన కార్యదర్శి ఖమ్మం వేంకటేశం

కోహెడ : కోహెడ మండల కేంద్రంలో  విలేకరుల సమావేశంలో ఆయన మాట్లాడుతూ ఆలయాల నిధులకు సంబంధించి ప్రజలకు వాస్తవాలను వెల్లడించాలని రాష్ట్ర ప్రభుత్వాన్ని డిమాండ్ చేశారు. హుస్నాబాద్ నియోజకవర్గంలోని కొత్తకొండ శ్రీ వీరభద్రస్వామి ఆలయానికి రూ.3.80 కోట్లు, పొట్లపల్లి శ్రీ రాజరాజేశ్వరస్వామి ఆలయానికి రూ.1.50 కోట్లు, హుస్నాబాద్ శ్రీ రేణుక ఎల్లమ్మ దేవస్థానానికి రూ.85 లక్షలు మంజూరయ్యాయంటూ జరుగుతున్న ప్రచారాన్ని ఖమ్మం వేంకటేశం తీవ్రంగా ఖండించారు. ఎండోమెంట్ శాఖ పరిధిలోని ఆయా దేవాలయాల బ్యాంకు ఖాతాల్లో ఉన్న ఫిక్స్‌డ్ డిపాజిట్లు ఇతర నిధులు ఆయా ఆలయాలకు చెందినవేనని ఆయన స్పష్టం చేశారు భక్తులు దాతలు ఎన్నో సంవత్సరాలుగా సమర్పించిన విరాళాలు, కానుకలతో సమకూరిన ఆలయ నిధులను రాష్ట్ర ప్రభుత్వ నిధులుగా చూపించడం వాస్తవాలను వక్రీకరించడమేనని అన్నారు. ఆలయాల ఖాతాల్లో ఉన్న నిధులను ఆలయాల అభివృద్ధి పనులకు వినియోగించేందుకు ప్రభుత్వం పరిపాలనా అనుమతులు ఇవ్వడం వేరు ఆ నిధులను ప్రభుత్వం మంజూరు చేసినట్లుగా ప్రచారం చేయడం వేరు అని ఆయన పేర్కొన్నారు అనుమతులు ఇవ్వడాన్ని నిధుల మంజూరుగా చిత్రీకరించి రాజకీయ ప్రచారం చేసుకోవడం ప్రజలను తప్పుదోవ పట్టించే చర్య అని విమర్శించారు. ప్రజల భక్తి దాతల సేవాభావంతో ఏర్పడిన ఆలయ నిధులపై రాజకీయ స్వార్థం కోసం క్రెడిట్ తీసుకోవడం మానుకోవాలని కాంగ్రెస్ నాయకులకు ఆయన సూచించారు. ప్రభుత్వం నిజంగా తన ఖజానా నుంచి నిధులు కేటాయించి ఉంటే వాటి వివరాలు, జీఓలు, బడ్జెట్ కేటాయింపులు, నిధుల విడుదల వివరాలను ప్రజల ముందుంచాలని డిమాండ్ చేశారు. ఆలయాల బ్యాంకు ఖాతాల్లో ఎంత మొత్తంలో నిధులు ఉన్నాయి. ఆ నిధులు ఎక్కడి నుంచి సమకూరాయి. ప్రభుత్వం ఎంత మొత్తాన్ని తన బడ్జెట్ నుంచి కేటాయించింది. ప్రస్తుతం ఆలయాల నిధుల్లో నుంచి ఎంత మొత్తాన్ని అభివృద్ధి పనులకు వినియోగిస్తున్నారు. అనే అంశాలపై రాష్ట్ర ప్రభుత్వం పూర్తి వివరాలతో శ్వేతపత్రం విడుదల చేయాలని ఖమ్మం వేంకటేశం డిమాండ్ చేశారు. ఆలయాల సొమ్ము ఆలయాలదే భక్తుల విరాళాలు భక్తులవే. వాటిని ప్రభుత్వ నిధులుగా చెప్పుకునే హక్కు ఎవరికీ లేదు. వాస్తవాలను ప్రజల ముందుంచాలి” అని ఆయన స్పష్టం చేశారు.