సౌర విద్యుత్ రంగంలో అపూర్వ రికార్డు.. కేంద్ర మంత్రి ప్రహ్లాద్ జోషి
సూర్య జాతీయ డెస్క్: పునరుత్పాదక ఇంధన రంగంలో భారత్ దూసుకుపోతున్న తీరుకు అద్దం పడుతూ దేశవ్యాప్తంగా సౌర విద్యుత్ ఉత్పాదన గణనీయంగా పెరుగుతోంది. కేంద్ర పునరుత్పాదక మరియు నూతన ఇంధన వనరుల శాఖ మంత్రి ప్రహ్లాద్ జోషి తాజాగా వెల్లడించిన వివరాల ప్రకారం, దేశంలో ప్రతి ఆరు రోజులకు ఏకంగా లక్ష రూఫ్‌టాప్ సోలార్ విద్యుత్ సంస్థాపనలు పూర్తవుతున్నాయి. పీఎం సూర్య ఘర్ ముఫ్త్ బిజ్లీ యోజన పథకం కింద ప్రజల నుంచి వస్తున్న అపూర్వ స్పందన కారణంగానే ఈ వేగవంతమైన పురోగతి సాధ్యమైందని ఆయన స్పష్టం చేశారు.
గృహ వినియోగదారులకు ఉచిత విద్యుత్‌ను అందించడంతో పాటు విద్యుత్ బిల్లుల భారాన్ని పూర్తిగా తగ్గించడమే లక్ష్యంగా కేంద్ర ప్రభుత్వం ఈ మహత్తర పథకానికి రూపకల్పన చేయడం జరిగింది. ఆన్‌లైన్ పోర్టల్ ద్వారా దరఖాస్తు చేసుకున్న వినియోగదారులకు సబ్సిడీ మొత్తాన్ని నేరుగా వారి ఖాతాలలో జమ చేస్తుండటంతో సామాన్య, మధ్యతరగతి కుటుంబాలు సోలార్ ప్లాంట్ల ఏర్పాటుకు ముందుకు వస్తున్నాయి. ఇండ్లపై సౌర ఫలకాలను ఏర్పాటు చేసుకోవడం ద్వారా వినియోగదారులు నెలకు వచ్చే కరెంట్ బిల్లుల నుంచి ఉపశమనం పొందడమే కాకుండా, మిగులు విద్యుత్‌ను గ్రిడ్‌కు విక్రయించి అదనపు ఆదాయాన్ని ఆర్జించే వెసులుబాటు లభిస్తోంది.
పర్యావరణ పరిరక్షణతో పాటు దేశాన్ని ఇంధన రంగంలో స్వయం సమృద్ధి దిశగా నడిపించేందుకు ఈ ప్రాజెక్టు అత్యంత కీలకమని మంత్రి ప్రహ్లాద్ జోషి అభివర్డించారు. సంప్రదాయ ఇంధన వనరులపై ఆధారపడటాన్ని తగ్గించి, హరిత ఇంధన వినియోగాన్ని పెంచే ప్రభుత్వ లక్ష్యానికి పౌరుల నుంచి లభిస్తున్న ఈ మద్దతు అభినందనీయమని ఆయన పేర్కొన్నారు. రాబోయే కాలంలో ఈ వేగాన్ని మరింత పెంచి లక్షలాది కుటుంబాలకు సోలార్ వెలుగులను అందించేందుకు అన్ని ఏర్పాట్లు చేస్తున్నట్లు మంత్రి వెల్లడించారు.
