దేశం చూసిన అత్యంత పిరికి ప్రధాని మోదీ: సీజేపీ నేత అభిజీత్ దీప్కే తీవ్ర విమర్శలు!

సూర్య నేషనల్ & పొలిటికల్ డెస్క్, న్యూఢిల్లీ: ఎన్నికల సంఘం తీరుపై దేశ రాజధానిలో శాంతియుతంగా నిరసన తెలుపుతున్న యువతపై పోలీసు బలగాలను ప్రయోగించి నిర్బంధించడంపై 'కాక్రోచ్ జనతా పార్టీ' (CJP) కీలక నేత అభిజీత్ దీప్కే కేంద్ర ప్రభుత్వంపై తీవ్రస్థాయిలో విరుచుకుపడ్డారు. భారత రాజకీయ చరిత్రలోనే నరేంద్ర మోదీ అత్యంత పిరికి ప్రధానమంత్రి అని, అలాంటి వ్యక్తి దేశానికి ప్రధానిగా ఉండటం దేశ ప్రజల దురదృష్టకరమని ఆయన ఘాటుగా వ్యాఖ్యానించారు. తమ పార్టీ నేతలు సౌరవ్ దాస్, అశుతోష్ రాంకాల కస్టడీని ఢిల్లీ కోర్టు పొడిగించిన అనంతరం ఆయన సోషల్ మీడియా వేదికగా ఈ ఆగ్రహాన్ని వ్యక్తం చేశారు.

పోలీసుల వెనుక దాక్కోవడం పౌరుషం కాదు:
జంతర్ మంతర్ వద్ద జాతీయ జెండాను ఎగురవేసేందుకు వెళ్లిన 27 ఏళ్ల యువకులను ఐదు రోజుల పాటు జైలులో ఉంచి, కోర్టు విచారణలను సైతం వాయిదా వేయిస్తూ నిర్బంధించడం ప్రభుత్వ పిరికితనానికి నిదర్శనమని అభిజీత్ దీప్కే ఆరోపించారు. తన మనవళ్ల వయసున్న యువకులను జైల్లో పెట్టి తాను చాలా శక్తిమంతుడినని ప్రధాని భావిస్తున్నారని, కానీ మొత్తం ఢిల్లీని స్తంభింపజేసి, వేలాది మంది పోలీసు బలగాల వెనుక దాక్కోవడం శక్తికి సంకేతం కాదని ఆయన ఎద్దేవా చేశారు. నిజమైన ధైర్యం అంటే ఎన్ని నిర్బంధాలు ఎదురైనా భయపడకుండా కోర్టు మెట్లు ఎక్కే సౌరవ్ దాస్, అశుతోష్‌లలోనూ, కొడుకు జైల్లో ఉన్నా వెరవని వారి తల్లుల గుండెల్లోనూ ఉందని ఆయన పేర్కొన్నారు.

ట్రంప్ ఒత్తిడికి తలొగ్గారన్న ఆరోపణ:
ఒకవైపు దేశ యువతపై ఉక్కుపాదం మోపుతూ విపక్షాలను అంతం చేసేందుకు ప్రభుత్వ యంత్రాంగాన్ని వాడుకుంటున్న ప్రధాని మోదీ.. అమెరికా అధ్యక్షుడు డొనాల్డ్ ట్రంప్ నుంచి చిన్నపాటి ఒత్తిడి రాగానే దేశ ప్రయోజనాలను తాకట్టు పెట్టారని దీప్కే విమర్శించారు. అటువంటి వ్యక్తి తనను తాను బలమైన నాయకుడిగా చెప్పుకోవడం హాస్యాస్పదమని వ్యాఖ్యానించారు.

భయం పూర్తిగా పోయేలా బెదిరించొద్దు:
'మేరీకోమ్' చిత్రంలోని సంభాషణను గుర్తుచేస్తూ.. ఎదుటివారిని భయం పూర్తిగా నశించిపోయేంతగా భయపెట్టకూడదని ప్రధానికి హితవు పలికారు. నిరంకుశ చర్యలతో దేశ యువతను భయపెట్టాలని చూశారని, అయితే ఇప్పుడు యువతలో ఆ భయమే పూర్తిగా తొలగిపోయిందని స్పష్టం చేశారు. ఎంతమంది పోలీసులను ప్రయోగించినా, ఎన్ని బెటాలియన్లను మోహరించినా నిరసనల నుంచి తాము వెనక్కి తగ్గే ప్రసక్తే లేదని తేల్చిచెప్పారు.