ఢిల్లీ పోలీసు ప్రధాన కార్యాలయంలో కేంద్ర హోంమంత్రి అమిత్ షా హైలెవల్ సమీక్ష

సూర్య జాతీయ డెస్క్: దేశ రాజధాని ప్రాంతంలో శాంతిభద్రతల పరిరక్షణ మరియు పోలీసింగ్ వ్యవస్థపై కేంద్ర హోంమంత్రి అమిత్ షా అత్యున్నత స్థాయి సమీక్ష నిర్వహించారు. మూడు వారాల వ్యవధిలో దిల్లీ పోలీసు ప్రధాన కార్యాలయంలో ఆయన ఈ తరహా సమావేశాన్ని నిర్వహించడం ఇది రెండోసారి కావడం గమనార్హం. దాదాపు మూడు గంటల పాటు సాగిన ఈ కీలక భేటీలో మహిళల భద్రత, వ్యవస్థీకృత నేరాలు, ఆయుధాల అక్రమ రవాణా మరియు రాజధానిలో మొత్తం శాంతిభద్రతల పరిస్థితిపై సీనియర్ అధికారులతో అమిత్ షా కూలంకషంగా చర్చించారు. ఈ సమావేశంలో దిల్లీ లెఫ్టినెంట్ గవర్నర్ తరంజిత్ సింగ్ సంధుతో పాటు పలువురు ఉన్నతాధికారులు పాల్గొన్నారు.

గత అక్టోబర్ 24న జరిగిన తొలి విడత సమీక్ష సమావేశంలో చర్చించిన అంశాల పురోగతిని ఈ భేటీలో ప్రధానంగా సమీక్షించారు. డ్రగ్ సిండికేట్లు, రద్దీ ప్రాంతాల్లో రక్షణ ఏర్పాట్లు, నిఘా వ్యవస్థను మరింత పటిష్టం చేయడంపై అధికారులకు స్పష్టమైన మార్గదర్శకాలు జారీ చేశారు. ముఖ్యంగా మహిళలకు పూర్తిస్థాయి భద్రత కల్పించేందుకు పోలీస్ పెట్రోలింగ్‌ను మరింత ముమ్మరం చేయాలని, నేరస్థులపై కఠిన చర్యలు తీసుకోవాలని హోంమంత్రి ఆదేశించారు. దేశ రాజధానిలో శాంతిభద్రతలకు విఘాతం కలిగించే ఎలాంటి అసాఘిక శక్తులను ఉపేక్షించేది లేదని ఆయన స్పష్టం చేశారు.