national
ఛత్తీస్‌గఢ్‌-తెలంగాణ సరిహద్దుల్లో భారీ ఆయుధ డంప్ లభ్యం..
ఛత్తీస్‌గఢ్‌-తెలంగాణ సరిహద్దు ప్రాంతమైన కర్రెగుట్టల అటవీ ప్రాంతంలో భద్రతా బలగాలు గురువారం భారీ ఆయుధ డంప్‌ను స్వాధీనం చేసుకున్నాయి. మావోయిస్టుల సంచారం ఉందనే ముందస్తు సమాచారంతో అటవీ ప్రాంతాన్ని చుట్టుముట్టిన భద్రతా బలగాలు, సీఆర్‌పీఎఫ్ బృందాలు సంయుక్తంగా విస్తృత గాలింపు చర్యలు చేపట్టాయి. ఈ తనిఖీల్లో భాగంగా మావోయిస్టులు భూమిలో దాచి ఉంచిన భారీ ఆయుధ సామాగ్రి బయటపడింది. ఇందులో అత్యంత ప్రమాదకరమైన 711 గ్రెనేడ్ లాంచర్ షెల్స్‌ను (యుబిజిఎల్) బలగాలు స్వాధీనం చేసుకున్నాయి. సరిహద్దుల్లో వ్యూహాత్మకంగా విధ్వంసకర చర్యలకు పాల్పడేందుకు మావోయిస్టులు ఈ పరికరాలను సిద్ధం చేసినట్లు అధికారులు అనుమానిస్తున్నారు. భద్రతా బలగాల సమయోచిత తనిఖీలతో పెద్ద ఎత్తున జరగబోయే ప్రమాదం తప్పిందని తెలుస్తోంది. ప్రశాంతతకు విఘాతం కలగకుండా ఈ ప్రాంతంలో ఇంకా విస్తృతంగా కూంబింగ్ చర్యలు కొనసాగుతున్నాయని భద్రతా వర్గాలు తెలిపాయి.
