లక్ష రూపాయలతో సోలార్ వెహికల్ తయారు చేసిన 17 ఏళ్ల విద్యార్థి

సూర్య టెక్నాలజీ డెస్క్: ఖరీదైన ఇంజనీరింగ్ ల్యాబ్‌లు, అత్యాధునిక వర్క్‌షాప్‌లు లేకపోయినా.. దృఢ సంకల్పం ఉంటే అద్భుతాలు సృష్టించవచ్చని నిరూపించాడు హర్యానాలోని గురుగ్రామ్‌కు చెందిన 17 ఏళ్ల విద్యార్థి అక్షిత్ ఖేరా. దిగువ మధ్యతరగతి కుటుంబాలకు, చిరు వ్యాపారులకు రవాణా వ్యయాలను భారీగా తగ్గించాలనే లక్ష్యంతో కేవలం రూ. 1,02,536 వ్యయంతో సౌరశక్తితో నడిచే వినూత్న మూడు చక్రాల వాహనాన్ని (Solar-assisted Three-wheeler) రూపొందించాడు. సాధారణ ఎలక్ట్రిక్ లేదా ఇంధన వాహనాలతో పోలిస్తే ఇది కిలోమీటరుకు కేవలం 13 పైసల రన్నింగ్ కాస్ట్‌తో మాత్రమే నడవడం విశేషం.

ఇంట్లో పనిచేసే వారి కష్టాలు చూసి ఆలోచన
గురుగ్రామ్‌లో ప్రతి శీతాకాలంలో పెరిగిపోయే వాయు కాలుష్యం, మరోవైపు తమ ఇంట్లో పనిచేసే మహిళ కుటుంబం ఎదుర్కొంటున్న రవాణా ఖర్చుల భారం అక్షిత్‌ను తీవ్రంగా ఆలోచింపజేశాయి. సరుకులు రవాణా చేయడంతో పాటు ఇద్దరు ప్రయాణించడానికి అనువైన, అందుబాటు ధరలో ఉండే వాహనాన్ని తయారు చేయాలని నిర్ణయించుకున్నాడు. కేవలం కంప్యూటర్ మోడలింగ్‌కు పరిమితం కాకుండా క్షేత్రస్థాయిలో నిజంగా పనిచేసే వాహనాన్ని రూపొందించాలనే పట్టుదలతో ప్రాజెక్ట్‌ను ప్రారంభించాడు. ఢిల్లీలోని మాయాపురి ఆటోమొబైల్ మార్కెట్‌లో తిరుగుతూ విడిభాగాల ధరలపై బేరసారాలు సాగించి సుమారు రూ. 17,000 ఆదా చేయడంతో పాటు డిజైన్‌లో మార్పులు చేస్తూ తయారీ వ్యయాన్ని రూ. 1.35 లక్షల నుంచి రూ. 1 లక్షకు పరిమితం చేయగలిగాడు.

రూఫ్‌గా ఉపయోగపడే సోలార్ ప్యానెల్.. 300 కిలోల మోసే సామర్థ్యం
ఈ త్రీ-వీలర్‌కు ఏర్పాటు చేసిన 400 వాట్ల మోనోక్రిస్టలైన్ సోలార్ ప్యానెల్ అటు వాహనం పైకప్పుగా రక్షణ కల్పిస్తూనే, ఇటు బ్యాటరీ ఛార్జింగ్‌కు అవసరమైన విద్యుత్‌ను ఉత్పత్తి చేస్తుంది. ఒక్కసారి ఛార్జ్ చేస్తే కనీసం 50 కిలోమీటర్లు ప్రయాణించగల ఈ వాహనం, దాదాపు 300 కిలోల వరకు బరువును సునాయాసంగా మోయగలదు. రోజుకు 50 కి.మీ ప్రయాణానికి అవసరమైన విద్యుత్‌లో సుమారు 63 శాతం శక్తిని సోలార్ ప్యానెలే సమకూరుస్తుందని, వేసవిలో ఇది 87 శాతం వరకు ఉంటుందని అక్షిత్ లెక్కగట్టాడు. దీర్ఘకాలిక మన్నిక, పర్యావరణ పరిరక్షణ దృష్ట్యా లెడ్-యాసిడ్ బ్యాటరీలకు బదులుగా ఆధునిక లిథియం-అయాన్ బ్యాటరీని అమర్చాడు.

వాహనాన్ని పేద కుటుంబానికి విరాళంగా ఇచ్చేందుకు నిర్ణయం
ప్రస్తుతం నగర రోడ్లపై విజయవంతంగా ట్రయల్ రన్స్ పూర్తి చేసుకున్న ఈ ప్రోటోటైప్‌ను మరింత ఆధునీకరించేందుకు ఆటోమొబైల్ తయారీ సంస్థల సహకారం కోసం అక్షిత్ ఆశిస్తున్నాడు. పెద్ద ఎత్తున ఉత్పత్తి చేపడితే దీని తయారీ ఖర్చు మరో 10 నుంచి 20 శాతం తగ్గే అవకాశం ఉందని వెల్లడించాడు. అంతేకాకుండా, తాను స్వయంగా రూపొందించిన ఈ మొదటి వాహనాన్ని అవసరంలో ఉన్న ఒక పేద కుటుంబానికి ఉచితంగా అందజేయాలని నిర్ణయించుకోవడం ద్వారా ఈ యువ ఆవిష్కర్త తన సేవా దృక్పథాన్ని కూడా చాటుకున్నాడు. చిన్న వయసులోనే సైన్స్ పరిజ్ఞానాన్ని సమాజ హితం కోసం ఉపయోగించిన అక్షిత్ ఖేరా ప్రతిభపై దేశవ్యాప్తంగా ప్రశంసలు వెల్లువెత్తుతున్నాయి.