ఇరాన్ న్యూక్లియర్ సమాచారానికి $20M రివార్డు ప్రకటించిన యూఎస్

సూర్య ఇంటర్నేషనల్ డెస్క్: ఇరాన్ అణు కార్యక్రమ సమాచారం కోసం అమెరికా ప్రభుత్వం కనీవినీ ఎరుగని స్థాయిలో భారీ నజరానాను ప్రకటించింది. ఇరాన్ నిర్వహిస్తున్న అణు కేంద్రాలు, అణు పరికరాలు, శాస్త్రవేత్తలు మరియు సంబంధిత సిబ్బంది కదలికలకు సంబంధించిన విశ్వసనీయ సమాచారాన్ని అందించిన వారికి ఏకంగా 20 మిలియన్ డాలర్ల వరకు (సుమారు రూ. 170 కోట్లకు పైగా) పారితోషికం ఇవ్వనున్నట్లు అమెరికా రక్షణ విభాగం సెంట్రల్ కమాండ్  అధికారికంగా వెల్లడించింది. అంతేకాకుండా, సమాచారం అందించే వ్యక్తులకు, వారి కుటుంబాలకు అవసరమైతే సురక్షిత ప్రాంతాలకు తరలించే  రక్షణను కూడా కల్పిస్తామని స్పష్టం చేసింది.

రివార్డ్స్ ఫర్ జస్టిస్ ప్రోగ్రామ్ ద్వారా ప్రకటన
యూఎస్ విదేశాంగ శాఖ పరిధిలో దశాబ్దాలుగా కొనసాగుతున్న 'రివార్డ్స్ ఫర్ జస్టిస్'  కార్యక్రమం కింద ఈ బంపర్ ఆఫర్‌ను ప్రకటించారు. అమెరికా ప్రయోజనాలు, పౌరుల భద్రతకు ముప్పు కలిగించే అంశాలపై సమాచారం రాబట్టేందుకు 1984లో ఈ విభాగాన్ని ఏర్పాటు చేశారు. ఇరాన్ అణు కార్యకలాపాల నెట్‌వర్క్, పరిశోధనలలో పాల్గొంటున్న శాస్త్రీయ బృందాలు మరియు పరికరాల సరఫరా మార్గాలను కనిపెట్టడమే లక్ష్యంగా సెంట్‌కామ్ 'ఎక్స్' (ట్విట్టర్) వేదికగా ఈ ప్రకటనను పోస్ట్ చేసింది.

ఐఏఈఏ పర్యవేక్షణ లోపమే ప్రధాన కారణం
అంతర్జాతీయ అణుశక్తి సంస్థ నిర్దేశించిన నిబంధనలను, తనిఖీలను ఇరాన్ ఉల్లంఘించడమే అమెరికా ఈ చర్య తీసుకోవడానికి ప్రధాన కారణమని విదేశాంగ శాఖ పేర్కొంది. ఇరాన్ నిబంధనలు పాటించకపోవడం వల్ల సెంట్రిఫ్యూజ్‌లు, కీలక అణు విడిభాగాల తయారీ మరియు నిల్వలపై ఐఏఈఏ పర్యవేక్షణ పూర్తిగా తెగిపోయిందని ఆరోపించింది. ఇరాన్ ఎంతవరకు యురేనియంను శుద్ధి చేసింది, ఎక్కడెక్కడ రహస్య స్థావరాలు ఏర్పాటు చేసుకుంది అనే స్పష్టత కొరవడటంతో అంతర్గత వర్గాల నుంచే సమాచారాన్ని రాబట్టేందుకు వాషింగ్టన్ ఈ వ్యూహాన్ని ఎంచుకుంది.

సంక్షోభ వేళ కీలక ముందడుగు
ఇప్పటికే ఇరాన్‌తో నెలకొన్న సైనిక, ఆర్థిక ఉద్రిక్తతల నేపథ్యంలో అమెరికా అధ్యక్షుడు డొనాల్డ్ ట్రంప్ ఇరాన్ ఆర్థిక వ్యవస్థ తీవ్రంగా దెబ్బతిన్నదని, ఒక ఒప్పందానికి రావాలని వారు కోరుకుంటున్నారని వ్యాఖ్యానించిన కొద్ది రోజుల్లోనే ఈ ప్రకటన వెలువడటం ప్రాధాన్యత సంతరించుకుంది. ముఖ్యంగా ఇరాన్ మధ్య ప్రాంతంలోని పిక్ యాక్స్ మౌంటైన్ వంటి అనుమానిత అణు స్థావరాలపై నిఘా కొనసాగుతున్న తరుణంలో, అమెరికా ప్రకటించిన 20 మిలియన్ డాలర్ల రివార్డు పశ్చిమాసియా రాజకీయాల్లో తీవ్ర చర్చనీయాంశంగా మారింది.