స్ట్రెయిట్ ఆఫ్ హోర్ముజ్ ప్రపోజల్ను తిరస్కరించిన ట్రంప్
ఇరాన్ విమానాలంక్షన్పై అమెరికా మినహాయింపు కోరిన ఇరాక్
సూర్య అంతర్జాతీయ డెస్క్: పశ్చిమాసియాలో ఉద్రిక్తతలను తగ్గించేందుకు మరియు కీలకమైన 'స్ట్రెయిట్ ఆఫ్ హోర్ముజ్' జలసంధిని తిరిగి తెరిచేందుకు ఇరాన్ ప్రతిపాదించిన ప్రత్యేక ప్రణాళికను అమెరికా అధ్యక్షుడు డొనాల్డ్ ట్రంప్ తిరస్కరించినట్లు తెలుస్తోంది. హోర్ముజ్ ప్రతిష్టంభనను అంతం చేసేందుకు ఏడు రోజుల వ్యవధిలో అన్ని వైపులా యుద్ధ వాతావరణాన్ని ముగించాలని, ఇరాన్ ఓడరేవులపై విధించిన ఆంక్షలు, నావికా దిగ్బంధనాన్ని తొలగించి, స్తంభింపజేసిన ఇరాన్ నిధులను విడుదల చేయాలని ఇరాన్ ప్రతిపాదన చేసింది. దీనికి ప్రతిఫలంగా హోర్ముజ్ జలసంధి ద్వారా వాణిజ్య నౌకల రాకపోకలను పునరుద్ధరిస్తామని స్పష్టం చేసింది. అయితే, అమెరికా అధికారులు ఇచ్చిన సమాచారం ఆధారంగా ట్రంప్ ఈ ప్రతిపాదనలకు నిరాకరించారని వార్తా సంస్థలు వెల్లడించాయి.
మరోవైపు ఇరాన్ విమానయాన సంస్థలపై అమెరికా విధించిన కఠిన ఆంక్షల ప్రభావం పొరుగు దేశమైన ఇరాక్పై తీవ్రంగా పడింది. ఇరాన్ విమానాలకు సేవలు అందిస్తే ఆంక్షలు తప్పవని అమెరికా హెచ్చరించడంతో ఇరాక్ తమ దేశంలోని విమానాశ్రయాల్లో ఇరాన్ విమానాల రాకపోకలను తాత్కాలికంగా నిలిపివేసింది. దీనివల్ల రోగులు, విద్యార్థులు, ఆధ్యాత్మిక యాత్రికులు మరియు సామాన్య పౌరులు తీవ్ర ఇబ్బందులు ఎదుర్కొంటున్న నేపథ్యంలో తమ విమానాశ్రయాలకు ఆంక్షల నుంచి మినహాయింపు ఇవ్వాలని ఇరాక్ ప్రభుత్వం అమెరికాను కోరింది. మానవతా దృక్పథంతో వైద్య చికిత్సలు, విద్య, మతపరమైన పర్యటనల నిమిత్తం విమాన సర్వీసులను పునరుద్ధరించేందుకు చర్యలు తీసుకోవాలని ఇరాక్ ప్రధాని కార్యాలయం ప్రత్యక్ష చర్చలు జరుపుతోంది.
ఇదిలా ఉండగా ప్రాంతీయ భద్రతా పరిస్థితులు మరింత క్షీణిస్తున్నాయి. సౌదీ అరేబియా భూభాగాన్ని లక్ష్యంగా చేసుకుని యెమెన్కు చెందిన హౌతీ తిరుగుబాటుదారులు ప్రయోగించిన రెండు బాలిస్టిక్ క్షిపణులు, రెండు డ్రోన్లను తమ వైమానిక దళం విజయవంతంగా కూల్చివేసినట్లు సౌదీ నేతృత్వంలోని కూటమి ప్రకటించింది. ఖమీస్ ముషాయత్ మరియు రాజధాని రియాద్ లక్ష్యంగా ఈ దాడులు జరిగాయి. సౌదీ అరేబియా, పాకిస్తాన్ మరియు తుర్కియే దేశాల సైనికధిపతులు రియాద్లో సమావేశమై రక్షణ సమీక్ష నిర్వహించిన కొద్ది గంటల్లోనే ఈ క్షిపణి దాడులు చోటుచేసుకోవడం గమనార్హం. ఇటీవల మక్కా ఉమ్మడి రక్షణ ఒప్పందంపై సంతకం చేసిన ఈ మూడు దేశాలు, తమలో ఏ ఒక్క దేశంపై దాడి జరిగినా మిగిలిన రెండు దేశాలపై జరిగిన దాడిగానే పరిగణిస్తామని ప్రకటించాయి.
