లాజిస్టిక్స్ రంగంలో చైనా 'ట్రేడ్ సూపర్‌వెపన్' ప్రాజెక్ట్ వెనుకడుగు
సూర్య అంతర్జాతీయ డెస్క్: ప్రపంచ వాణిజ్య రంగంలో కలకలం సృష్టించిన చైనా డిజిటల్ ప్రాజెక్ట్ అనూహ్యంగా కనుమరుగవుతోంది. కొన్ని సంవత్సరాల క్రితం చైనా ప్రభుత్వం అత్యంత ప్రతిష్టాత్మకంగా ప్రారంభించిన 'లాంక్' (LOGINK) గ్లోబల్ లాజిస్టిక్స్ ప్లాట్‌ఫామ్ అంతర్జాతీయంగా తీవ్ర విమర్శలను ఎదుర్కొంటూ వెనకడుగు వేసింది. ప్రపంచ దేశాల సరుకు రవాణా, కస్టమ్స్ మరియు పోర్ట్ డేటాను ఒకే వేదికపైకి తెచ్చి అంతర్జాతీయ వాణిజ్యాన్ని నియంత్రించగల శక్తివంతమైన 'ట్రేడ్ సూపర్‌వెపన్' లాగా ఈ వ్యవస్థ పనిచేస్తుందని అమెరికా గతంలో తీవ్ర ఆందోళన వ్యక్తం చేసింది. అయితే అమెరికా మరియు ఇతర పాశ్చాత్య దేశాల నుంచి ఎదురైన బలమైన వ్యతిరేకత, దౌత్యపరమైన ఒత్తిళ్ల కారణంగా ఈ ప్రాజెక్ట్ విస్తరణ పూర్తిగా నిలిచిపోయినట్లు తాజా నివేదికలు స్పష్టం చేస్తున్నాయి.
ప్రపంచవ్యాప్తంగా వివిధ దేశాల ఓడరేపులు మరియు రవాణా సంస్థలతో అనుసంధానం కావాల్సిన ఈ ప్లాట్‌ఫామ్, భద్రతాపరమైన ముప్పు ఉందనే ఆందోళనల కారణంగా పశ్చిమ దేశాల నుంచి తీవ్ర ప్రతిఘటనను ఎదుర్కొంది. అమెరికా ప్రభుత్వం తన అధికారిక యంత్రాంగంలో ఈ సాఫ్ట్‌వేర్ వాడకాన్ని పూర్తిగా నిషేధించడంతో పాటు మిత్రదేశాలను కూడా అప్రమత్తం చేసింది. ఈ పరిణామాల నేపథ్యంలో అంతర్జాతీయ పోర్టులు మరియు లాజిస్టిక్స్ సంస్థలు క్రమంగా ఈ ప్రాజెక్ట్ నుంచి దూరమయ్యాయి. చైనాలో కూడా ఈ ప్లాట్‌ఫామ్‌కు సంబంధించిన కార్యాలయాలు మూతపడటం మరియు చట్టపరమైన చిక్కులు ఎదురుకావడంతో దీని మనుగడ ప్రశ్నార్థకంగా మారింది. ఒకప్పుడు అంతర్జాతీయ వాణిజ్య మార్కెట్లను శాసించగలదంటూ హెచ్చరించిన ఈ వ్యవస్థ ఇలా అకస్మాత్తుగా కనుమరుగవడం కార్పొరేట్ వర్గాల్లో చర్చనీయాంశమైంది.
