భక్తి, సేవకే ప్రాధాన్యం.. ఆదర్శంగా ‘టీం విఘ్నేశ్వర’

• 21 అడుగుల ధాన్య గణపతికి ఘనంగా అణుపు మహోత్సవం

గాజువాక: భక్తి, సేవా భావంతో ‘టీం విఘ్నేశ్వర’ బృందం బియ్యం, పప్పు దినుసులతో ఏర్పాటు చేసిన 21 అడుగుల భారీ వినాయకుడి అణుపు మహోత్సవం వైభవంగా జరిగింది. భక్తుల నుంచి ఎలాంటి రుసుములు, విరాళాలు తీసుకోకుండా 21 రోజుల పాటు నిష్ఠతో పూజలు నిర్వహించి, సుమారు 10 వేల మందికి అన్నదానం చేసి నిర్వాహకులు ఆదర్శంగా నిలిచారు. వీరి సేవా దృక్పథాన్ని సౌత్ ఏసీపీ ప్రత్యేకంగా ప్రశంసించారు. తప్పెటగుళ్లు, కోలాటం, సాంస్కృతిక ప్రదర్శనల నడుమ సాగిన శోభాయాత్రలో భక్తులు పెద్ద సంఖ్యలో పాల్గొన్నారు. ఈ సందర్భంగా నిర్వహించిన లక్కీ డ్రాలో 25 కేజీల లడ్డూను వెంకటేష్, నాయుడు బాబు దంపతులు గెలుచుకోగా, 111 కేజీల లడ్డూను వేలంపాటలో మాజీ కౌన్సిలర్ లంకలత తనయుడు లంక తేజ రూ.67,001కు దక్కించుకున్నారు. సంప్రదాయబద్ధంగా ఉత్సవాలు నిర్వహించిన బృందాన్ని స్థానికులు అభినందించారు.