ఇటలీలో పిల్లలకు సోషల్ మీడియాపై కఠిన ఆంక్షలు
సూర్య అంతర్జాతీయ డెస్క్: మైనర్లు మరియు యుక్తవయస్సులో ఉన్న పిల్లలను డిజిటల్ వ్యసనం నుంచి రక్షించే దిశగా ఇటలీ ప్రభుత్వం సంచలన నిర్ణయం తీసుకుంది. సోషల్ మీడియా ప్లాట్ఫామ్ల వినియోగంపై కఠినమైన వయసు నిబంధనలను తీసుకువస్తూ పార్లమెంటులో ప్రవేశపెట్టనున్న సెక్యూరిటీ డిక్రీకి ఒక కీలక సవరణను రూపొందించింది. దీని ప్రకారం 13 సంవత్సరాల కంటే తక్కువ వయసున్న పిల్లలు సోషల్ నెట్వర్క్లను ఉపయోగించకుండా పూర్తిస్థాయిలో నిషేధం విధించనున్నారు. తల్లిదండ్రుల అనుమతి ఉన్నప్పటికీ చిన్నారులు ఖాతాలు తెరిచేందుకు వీలులేకుండా ఈ నిబంధనను కఠినతరం చేశారు.
ఈ కొత్త నిబంధనల ప్రకారం, 13 నుంచి 15 సంవత్సరాల వయసు గల టీనేజర్లు సోషల్ మీడియాను ఉపయోగించాలంటే వారి ఖాతాలు తల్దండ్రులు లేదా సంరక్షకుల అకౌంట్తో విధిగా అనుసంధానించబడి ఉండాలి. ఎలాంటి పేరంటల్ లింక్ లేకుండా స్వతంత్రంగా ఖాతాలను నిర్వహించే సౌలభ్యం 16 సంవత్సరాలు నిండిన వారికి మాత్రమే లభిస్తుంది. సోషల్ మీడియా కంపెనీలు సైతం ఈ వయసు నిబంధనలను కచ్చితంగా అమలు చేయడానికి అవసరమైన వయసు నిర్ధారణ (Age Verification) పద్ధతులను పాటించాల్సి ఉంటుందని స్పష్టం చేశారు.
చిన్నారులలో పెరుగుతున్న మానసిక ఆరోగ్య సమస్యలు, నిద్రలేమి మరియు సోషల్ మీడియా వ్యసనాన్ని అరికట్టేందుకే ఈ చట్టాన్ని తెస్తున్నట్లు ఇటలీ ప్రధాని జార్జియా మెలోని ప్రభుత్వం వెల్లడించింది. యూరోపియన్ యూనియన్ నుంచి వచ్చే విధివిధానాల కోసం వేచి చూడకుండా, నవంబర్ నెలాఖరు నాటికి ఈ చట్టానికి ఆమోదం ముద్ర వేయాలని ప్రభుత్వం భావిస్తోంది. విద్యారంగానికి సంబంధించిన యాప్లను ఈ నిబంధనల నుంచి మినహాయించినట్లు అధికారులు తెలిపారు. యూరప్లో పిల్లల ఆన్లైన్ భద్రత కోసం తీసుకుంటున్న కఠినమైన చర్యల్లో ఇటలీ తాజా నిర్ణయం ప్రాధాన్యత సంతరించుకుంది.