ఇజ్రాయెల్‌కు ఏటా అందే 4 బిలియన్ డాలర్ల సైనిక సాయాన్ని నిలిపివేయనున్న అమెరికా
సూర్య అంతర్జాతీయ డెస్క్: ఇజ్రాయెల్‌కు అమెరికా ప్రభుత్వం వైపు నుంచి అందిస్తున్న సుమారు 4 బిలియన్ డాలర్ల వార్షిక సైనిక సాయాన్ని ఈ ఏడాది చివరి నాటికి నిలిపివేయనున్నట్లు అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. ఇజ్రాయెల్ ప్రధాన మంత్రి బెంజమిన్ నెతన్యాహుతో జరిగిన చర్చల అనంతరం ఈ కీలక నిర్ణయం తీసుకున్నట్లు ఆయన వెల్లడించారు. ఆర్థికంగా బలపడిన ఇజ్రాయెల్‌కు ఇకపై ప్రత్యక్షంగా ఆ రకమైన నిధుల సహాయం అవసరం లేదని ట్రంప్ స్పష్టం చేశారు.
ఇజ్రాయెల్ ప్రధాని నెతన్యాహుతో తాము ఈ ఒప్పందానికి వచ్చామని, 2026 చివరి నాటికి నిధుల చెల్లింపులు పూర్తిగా నిలిచిపోతాయని ట్రంప్ మీడియాకు తెలిపారు. అయితే అమెరికా నుంచి సంప్రదాయక ఆయుధాల కొనుగోళ్లు మాత్రం యథావిధిగా కొనసాగుతాయని, ఇజ్రాయెల్‌కు అవసరమైన సందర్భాల్లో ఆయుధ విక్రయాలు జరుపుతామని ఆయన స్పష్టం చేశారు. కేవలం ఉచిత నిధులు లేదా బహుమతుల రూపంలో ఇచ్చే ఆర్థిక సహాయాన్ని మాత్రమే ఆపేస్తున్నామని వివరించారు.
అమెరికాలో రాజకీయ విమర్శలను తగ్గించే దిశగా ఈ నిర్ణయం దోహదపడుతుందని విశ్లేషకులు భావిస్తున్నారు. ప్రతిసారీ విదేశీ సహాయాన్ని కొందరు రాజకీయ ప్రత్యర్థులు తప్పుబడుతున్న నేపథ్యంలో, ఇజ్రాయెల్ ఆర్థికంగా స్వయంసమృద్ధి సాధించినందున ఈ సాయాన్ని నిలిపివేయడం సముచితమని ట్రంప్ అభిప్రాయపడ్డారు.
ఈ నిర్ణయం ఇరు దేశాల మధ్య రక్షణ రంగ సంబంధాలపై ఎలాంటి ప్రభావం చూపుతుందనే అంశంపై అంతర్జాతీయ రాజకీయ వర్గాల్లో చర్చ జరుగుతోంది. ప్రత్యక్ష ఆర్థిక సాయం నిలిచిపోయినా, ఆయుధ కొనుగోళ్లు మరియు వాణిజ్య ఒప్పందాల ద్వారా వ్యూహాత్మక భాగస్వామ్యం కొనసాగుతుందని అమెరికా వర్గాలు స్పష్టం చేస్తున్నాయి.
