హోర్ముజ్ జలసంధి రీఓపెన్: 2 రోజుల ప్లాన్‌పై ఇరాన్ కీలక చర్చలు
సూర్య ఇంటర్నేషనల్ బ్యూరో, టెహ్రాన్: పశ్చిమాసియాలో ముదురుతున్న యుద్ధ సంక్షోభం, అంతర్జాతీయంగా ముడిచమురు సరఫరాపై తీవ్ర ప్రభావం చూపుతున్న కీలక హోర్ముజ్ జలసంధి రవాణా స్తంభనపై ఇరాన్ కీలక ప్రకటన చేసింది. చమురు నౌకలు, వాణిజ్య నౌకల రాకపోకలను పునరుద్ధరించేందుకు ఉద్దేశించిన ‘రెండు రోజుల ప్రణాళిక’పై ప్రస్తుతం తీవ్రస్థాయి చర్చలు, సంప్రదింపులు జరుగుతున్నాయని ఇరాన్ విదేశాంగ మంత్రి అబ్బాస్ అరాఘ్చీ వెల్లడించారు.
అమెరికా, ఇజ్రాయెల్‌తో నెలకొన్న సైనిక ఉద్రిక్తతల నేపథ్యంలో హోర్ముజ్ జలసంధి గుండా నౌకాయానం నిలిచిపోవడంతో ప్రపంచవ్యాప్తంగా ఇంధన మార్కెట్లు తీవ్ర ఒడిదుడుకులను ఎదుర్కొంటున్నాయి. ఈ ఉద్రిక్తతలను చల్లార్చేందుకు సౌదీ అరేబియా, ఖతార్, పాకిస్థాన్, టర్కీ వంటి ప్రాంతీయ దేశాలు సాగిస్తున్న దౌత్య ప్రయత్నాల మధ్య ఇరాన్ మంత్రి ఈ వ్యాఖ్యలు చేయడం ప్రాధాన్యత సంతరించుకుంది. సముద్ర మార్గంలో వాణిజ్య నౌకలకు పూర్తి స్థాయి రక్షణ కల్పించేలా, అదే సమయంలో ప్రాంతీయ భద్రతా నిబంధనలకు కట్టుబడి ఉండేలా ఈ తాత్కాలిక ప్రణాళికపై బహుళ పక్ష చర్చలు నడుస్తున్నట్లు ఆయన పేర్కొన్నారు.
అయితే, సంప్రదింపులు ఒక కొలిక్కి వచ్చేంతవరకు ఎలాంటి అధికారిక ఒప్పందం అమల్లోకి రాదని, తమ దేశ సార్వభౌమాధికారం, భద్రతా ప్రయోజనాలకు అత్యున్నత ప్రాధాన్యత ఉంటుందని ఇరాన్ స్పష్టం చేసింది. ప్రపంచ చమురు రవాణాలో దాదాపు ఐదో వంతు వాటా కలిగిన హోర్ముజ్ జలసంధి తిరిగి తెరుచుకుంటే అంతర్జాతీయ వాణిజ్యానికి, భారత్ సహా ఆసియా దేశాల ఇంధన భద్రతకు భారీ ఊరట లభించనుంది.
.
