ఇరాక్ ఖోర్ మోర్ గ్యాస్ ఫీల్డ్‌పై డ్రోన్ దాడి: నిలిచిన ఉత్పత్తి
సూర్య ఇంటర్నేషనల్ డెస్క్: ఉత్తర ఇరాక్‌లోని కుర్దిస్తాన్ రీజియన్‌లో ఉన్న అత్యంత కీలకమైన, అతిపెద్ద సహజ వాయువు ఉత్పత్తి కేంద్రమైన ఖోర్ మోర్ గ్యాస్ ఫీల్డ్‌పై డ్రోన్ దాడి జరగడంతో అక్కడ ఉత్పత్తి కార్యకలాపాలు పూర్తిగా నిలిచిపోయాయి. ఆదివారం రాత్రి ఈ సముదాయాన్ని లక్ష్యంగా చేసుకుని డ్రోన్ దాడి జరిగిందని, దాడి అనంతరం క్షేత్రం నుంచి దట్టమైన పొగలు వెలువడ్డాయని అంతర్జాతీయ వార్తా సంస్థ రాయిటర్స్ భద్రతా వర్గాలను ఉటంకిస్తూ వెల్లడించింది. తదుపరి దాడులు జరిగే ప్రమాదం ఉండటంతో ప్లాంట్‌లో పనిచేస్తున్న సిబ్బంది, ఇంజనీర్లను అప్రమత్తం చేసి తక్షణమే సురక్షిత బంకర్లు, షెల్టర్లలోకి తరలించారు.
ప్లాంట్‌లోని ఇంజనీరింగ్ వర్గాల ప్రాథమిక సమాచారం ప్రకారం, పేలుడు పదార్థాలతో వచ్చిన డ్రోన్ ఒక గ్యాస్ నిల్వ కేంద్రాన్ని (స్టోరేజ్ ఫెసిలిటీ) తాకడంతో మంటలు చెలరేగాయి. దాడి తీవ్రత దృష్ట్యా ముందస్తు భద్రతా చర్యగా యునైటెడ్ అరబ్ ఎమిరేట్స్‌కు చెందిన ప్రముఖ ఇంధన సంస్థ డనా గ్యాస్ (Dana Gas) నిర్వహిస్తున్న ఈ ప్లాంట్‌లో ఉత్పత్తి ప్రక్రియను పూర్తిగా నిలిపివేశారు. ఈ క్షేత్రం నుంచి సరఫరా అయ్యే గ్యాస్‌పైనే ప్రాంతీయ విద్యుత్ ఉత్పత్తి కేంద్రాలు ప్రధానంగా ఆధారపడి ఉన్నందున, ఉత్పత్తి నిలిచిపోవడం విద్యుత్ ఉత్పత్తి వ్యవస్థపై తీవ్ర ప్రభావం చూపే ప్రమాదం ఏర్పడింది.
కుర్దిస్తాన్ స్వయంప్రతిపత్తి ప్రాంతంలో విద్యుత్ వ్యవస్థకు వెన్నెముకగా నిలిచే ఈ వ్యూహాత్మక ఇంధన క్షేత్రాన్ని లక్ష్యంగా చేసుకుని దాడులు జరగడం ఇదే మొదటిసారి కాదు. గతంలో కూడా పలుమార్లు రాకెట్లు, డ్రోన్లతో ఇక్కడ దాడులు జరిగాయి. పశ్చిమాసియాలో ప్రాంతీయ ఉద్రిక్తతలు తీవ్రరూపం దాల్చిన తరుణంలో, ఇరాక్‌లోని కీలక ఇంధన మౌలిక వసతుల భద్రత ప్రశ్నార్థకంగా మారింది. దాడికి దారితీసిన పరిస్థితులు, నష్ట తీవ్రతను అంచనా వేసేందుకు భద్రతా బలగాలు, సాంకేతిక నిపుణులు రంగంలోకి దిగి సమగ్ర దర్యాప్తు ప్రారంభించారు.
