పాకిస్తాన్ కొహాట్ ఆత్మాహుతి దాడిలో విస్ఫోటం: 869 కిలోల పేలుడు పదార్థాలు వాడినట్లు బాంబ్ డిస్పోజల్ యూనిట్ వెల్లడి
సూర్య అంతర్జాతీయ డెస్క్: పాకిస్తాన్లోని ఖైబర్ పఖ్తుంఖ్వా ప్రావిన్స్ కొహాట్ పాత పోలీస్ లైన్స్ ప్రాంగణంలో ఇటీవల జరిగిన భీకర ఆత్మాహుతి దాడికి సంబంధించి దిగ్భ్రాంతికర విషయాలు వెలుగుచూశాయి. ఈ విధ్వంసకర దాడిలో ఉగ్రవాదులు ఏకంగా 869 కిలోగ్రాముల అత్యంత శక్తివంతమైన పేలుడు పదార్థాలను ఉపయోగించినట్లు బాంబ్ డిస్పోజల్ యూనిట్(బీడీయూ) తమ సమగ్ర దర్యాప్తు నివేదికలో అధికారికంగా వెల్లడించింది. ఈ భారీ పేలుడు దాటికి సంఘటనా స్థలంలో దాదాపు 11 అడుగుల వెడల్పు, 4.6 అడుగుల లోతుతో భారీ గుంత ఏర్పడిందని, సమీపంలోని భవనాలు కుప్పకూలడంతో పాటు భారీ ప్రాణనష్టం సంభవించిందని అధికారులు ధ్రువీకరించారు.
ఈ దాడికి సంబంధించిన పేలుడు తీవ్రత, పేలుడు పదార్థాల రకం మరియు వినియోగించిన వాహనంపై బీడీయూ బృందం క్షేత్రస్థాయిలో లోతైన విశ్లేషణ నిర్వహించింది. కారు బాంబు పేలుడు తర్వాత ఉగ్రవాదులు ప్రాంగణంలోకి చొరబడి స్పెషల్ బ్రాంచ్ భవనంలో నక్కి కాల్పులు జరిపిన నేపథ్యంలో, అక్కడ నిర్వహించిన కార్డన్ అండ్ సెర్చ్ ఆపరేషన్లో పేలకుండా ఉన్న భారీ పేలుడు పరికరాలను స్వాధీనం చేసుకున్నారు. గ్రౌండ్ ఫ్లోర్ నుంచి రెండు ఐఈడీలను, మొదటి అంతస్తులో లభించిన సూసైడ్ జాకెట్ నుంచి మరో నాలుగు ఐఈడీలను నిర్వీర్యం చేసినట్లు నివేదికలో పేర్కొన్నారు. ఈ వివరాలతో కూడిన పూర్తి నివేదికను తదుపరి చట్టపరమైన దర్యాప్తు కోసం పెషావర్ సెంట్రల్ పోలీస్ ఆఫీస్కు సమర్పించారు.
18న శుక్రవారం ప్రార్థనల సమయంలో సంభవించిన ఈ ఘోర దాడిలో పోలీసు సిబ్బందితో సహా దాదాపు31 మంది ప్రాణాలు కోల్పోగా,100 మందికి పైగా తీవ్రంగా గాయపడిన సంగతి తెలిసిందే. సుమారు22 గంటల పాటు సాగిన భద్రతా దళాల ఎదురుకాల్పుల ఆపరేషన్లో మొత్తం ఎనిమిది మంది ఉగ్రవాదులు హతమయ్యారు. ఇంత భారీ పరిమాణంలో ఆర్డీఎక్స్, ఇతర పేలుడు పదార్థాలు భద్రతా వలయాలను దాటుకుని పోలీస్ ప్రధాన కార్యాలయం సమీపంలోకి ఎలా చేరాయనే దానిపై పాక్ భద్రతా ఏజెన్సీలు అంతర్గత విచారణను వేగవంతం చేశాయి. నిఘా వైఫల్యాలు మరియు సరిహద్దుల గుండా సాగుతున్న ఉగ్ర నెట్వర్క్ల కార్యకలాపాలపై తీవ్ర స్థాయిలో ఆందోళనలు వ్యక్తమవుతున్నాయి.
