'రామాయణ' మూవీ లీక్డ్ వీడియోలపై మేకర్స్ ఫైర్.. క్రిమినల్ కేసులు, కోర్టు ఉల్లంఘన చర్యల హెచ్చరిక!

సూర్య ఎంటర్‌టైన్‌మెంట్ డెస్క్: బాలీవుడ్ స్టార్ హీరో రణ్‌బీర్ కపూర్, సై పల్లవి మరియు రోకింగ్ స్టార్ యశ్ ప్రధాన పాత్రల్లో ప్రముఖ దర్శకుడు నితీష్ తివారి తెరకెక్కిస్తున్న పౌరాణిక దృశ్యకావ్యం రామాయణ. భారతదేశంలోనే అత్యంత ప్రతిష్టాత్మక బడ్జెట్‌తో నిర్మిస్తున్న ఈ భారీ ప్రాజెక్ట్ నుంచి ఇటీవల కొన్ని కీలకమైన ఫైట్ సీన్లు, పిక్స్ సోషల్ మీడియాలో లీక్ కావడం సినీ వర్గాల్లో తీవ్ర కలకలం రేపింది. ఈ నేపథ్యంలో చిత్ర నిర్మాణ సంస్థ ఈ అక్రమ లీకులపై అత్యంత కఠినంగా స్పందిస్తూ ఒక సంచలన ప్రకటన విడుదల చేసింది. అనుమతి లేకుండా దృశ్యాలను రికార్డు చేసినా లేదా నెట్టింట షేర్ చేసినా క్రిమినల్ చర్యలు తప్పవని హెచ్చరించింది.

సినిమాకు సంబంధించిన ఏ చిన్న దృశ్యాన్నైనా థియేటర్లలో లేదా సెట్స్‌లో రికార్డ్ చేయడం, సోషల్ మీడియా ప్లాట్‌ఫామ్‌లలో అప్‌లోడ్ చేయడం తీవ్రమైన నేరమని మేకర్స్ స్పష్టం చేశారు. బాంబే హైకోర్టు గతంలో ఇచ్చిన ఆదేశాలను ఉదహరిస్తూ, కాపీరైట్ చట్టం 1957, సినిమాటోగ్రాఫ్ చట్టం 1952, భారతీయ నవ సంహిత 2023 మరియు ఐటీ చట్టం 2000 నిబంధనల ప్రకారం ఇది కాపీరైట్ ఉల్లంఘనే కాకుండా కోర్టు దిక్కార నేరం కిందకు వస్తుందని తెలిపారు. ఇటువంటి చర్యలకు పాల్పడే వారిపై ఎలాంటి ముందస్తు నోటీసులు లేకుండానే నేరుగా క్రిమినల్, సివిల్ మరియు కోర్టు ఉల్లంఘన పిటిషన్లు దాఖలు చేస్తామని హెచ్చరించారు.

ఇప్పటికే సామాజిక మాధ్యమాలలో చెక్కర్లు కొడుతున్న లీక్డ్ వీడియోలను తక్షణమే తొలగించాలని చిత్ర యూనిట్ నెటిజన్లను, వివిధ ఖాతాల నిర్వాహకులను ఆదేశించింది. ముఖ్యంగా లక్ష్మణుడు శూర్పణఖ ముక్కు కోసిన అనంతరం వచ్చే రాక్షసుల పోరాట ఘట్టానికి సంబంధించిన సుదీర్ఘమైన విజువల్స్ ఆన్‌లైన్‌లో ప్రత్యక్షం కావడంపై చిత్ర బృందం తీవ్ర ఆగ్రహంతో ఉంది. కోట్ల రూపాయల బడ్జెట్, వేలాది మంది సాంకేతిక నిపుణుల కష్టం దాగి ఉన్న ఈ డ్రీమ్ ప్రాజెక్ట్ విజువల్స్ లీక్ కావడం పట్ల నిర్మాతలు నమిత్ మల్హోత్రా తో పాటు చిత్ర బృందం తీవ్ర అసంతృప్తి వ్యక్తం చేస్తోంది.

ప్రస్తుతం లీక్ అయిన క్లిప్పులను డిలీట్ చేయించేందుకు గూగుల్, మెటా, ఎక్స్ వంటి ప్లాట్‌ఫామ్‌లతో లీగల్ టీమ్ సంప్రదింపులు జరుపుతోంది. పైరసీ మరియు అక్రమ రికార్డింగ్‌లను అరికట్టేందుకు చట్టపరమైన అన్ని చర్యలు తీసుకుంటామని మేకర్స్ పునరుద్ఘాటించారు. నవంబర్ 2026 నాటికి ప్రేక్షకుల ముందుకు రాబోతున్న ఈ పౌరాణిక చిత్రానికి సంబంధించిన విజువల్స్ మరియు కంటెంట్ గోప్యతను కాపాడేందుకు చిత్ర యూనిట్ తీసుకున్న ఈ ఘాటు నిర్ణయం ప్రస్తుతం సినీ వర్గాల్లో హాట్ టాపిక్‌గా మారింది.

Also Read: దిల్జిత్ దోసాంజ్ ఇండోర్ కాన్సర్ట్‌పై ఆంక్షలు.. ఆ నాలుగు పాటలపై నిషేధం!