‘రామాయణ’ కోసం చిన్న సినిమా షోల కోత: కేంద్ర మంత్రికి సినీ కార్మిక సంఘం సంచలన లేఖ

సూర్య ఎంటర్‌టైన్‌మెంట్ డెస్క్: భారీ బడ్జెట్ చిత్రాల విడుదల సమయంలో చిన్న సినిమాలకు థియేటర్లు దక్కకపోవడం భారతీయ సినీ పరిశ్రమలో ఎప్పటి నుంచో ఉన్న ప్రధాన సమస్య. తాజాగా ఈ వివాదం మరోసారి తీవ్రరూపం దాల్చింది. జాతీయ అవార్డు గ్రహీత వినోద్ కాప్రి దర్శకత్వంలో తెరకెక్కిన ‘పైర్’ (Pyre) చిత్రానికి థియేటర్ల సంఖ్యను అకస్మాత్తుగా తగ్గించడంపై ఆల్ ఇండియా సినీ వర్కర్స్ అసోసియేషన్ (AICWA) తీవ్ర ఆగ్రహం వ్యక్తం చేసింది. నితీష్ తివారీ దర్శకత్వంలో వచ్చిన భారీ చిత్రం ‘రామాయణ’ విడుదలైన తర్వాత, మంచి ఆదరణ పొందుతున్న పైర్ సినిమా స్క్రీన్లను దాదాపు 75 శాతం మేర తగ్గించారని ఆరోపిస్తూ అసోసియేషన్ అధ్యక్షుడు సురేష్ శ్యామ్‌లాల్ గుప్తా కేంద్ర సమాచార మరియు ప్రసార శాఖ మంత్రి అశ్విని వైష్ణవ్‌కు లేఖ రాశారు.

కేవలం రెండున్నర కోట్ల రూపాయల చిన్న బడ్జెట్‌తో రూపొందిన పైర్ సినిమా, ప్రేక్షకుల మౌత్ టాక్ ద్వారా ఎనభై స్క్రీన్ల నుంచి నాలుగు వందల స్క్రీన్లకు విస్తరించిందని సినీ కార్మిక సంఘం తమ లేఖలో పేర్కొంది. అయితే రామాయణ చిత్రం విడుదలైన వెంటనే, హౌస్‌ఫుల్ కలెక్షన్లతో నడుస్తున్న ఈ చిన్న సినిమాను వంద లోపు స్క్రీన్లకు పరిమితం చేయడం అన్యాయమని ఆవేదన వ్యక్తం చేసింది. తాము భారీ బడ్జెట్ చిత్రాలకు వ్యతిరేకం కాదని, వాటి విజయం వల్ల వందలాది మంది కార్మికులకు ఉపాధి లభిస్తుందని స్పష్టం చేస్తూనే, ఒక పెద్ద సినిమా విజయం కోసం ప్రేక్షకులు ఆదరిస్తున్న చిన్న సినిమాను బలిచేయడం ఏమాత్రం సమంజసం కాదని అసోసియేషన్ అభిప్రాయపడింది.

భారతీయ సినీ పరిశ్రమకు చిన్న చిత్రాలే వెన్నెముక వంటివని, కొత్త ప్రతిభను ప్రోత్సహించే ఇటువంటి చిత్రాలను కాపాడాల్సిన బాధ్యత ప్రభుత్వంపై ఉందని లేఖలో వివరించారు. ఎంతో కష్టపడి నిధులు సమకూర్చుకుని సినిమాలు నిర్మించే చిన్న నిర్మాతలకు థియేటర్ల వద్ద ఇలాంటి చేదు అనుభవాలు ఎదురైతే, భవిష్యత్తులో కొత్తవారు పరిశ్రమలోకి రావడానికి భయపడతారని, తద్వారా లక్షలాది మంది సినీ కార్మికులు ఉపాధి కోల్పోయే ప్రమాదం ఉందని ఆందోళన వ్యక్తం చేశారు. హనుమాన్ వంటి చిన్న చిత్రాలు సాధించిన అద్భుత విజయాలను ఈ సందర్భంగా ఉదాహరణగా చూపిస్తూ, అన్ని చిత్రాలకు సమాన అవకాశాలు కల్పించేలా కేంద్ర ప్రభుత్వం ఒక సమగ్రమైన స్క్రీన్ కేటాయింపు విధానాన్ని రూపొందించాలని డిమాండ్ చేశారు.

పైర్ సినిమా షోలను నాలుగు వందల నుంచి వందకు ఎందుకు తగ్గించారనే దానిపై తక్షణమే నిష్పక్షపాత విచారణ జరిపించాలని కేంద్ర మంత్రిని సినీ కార్మిక సంఘం కోరింది. విచారణలో అక్రమాలు జరిగినట్లు తేలితే సంబంధిత థియేటర్ యజమానులు మరియు పంపిణీదారులపై ఎఫ్ఐఆర్ నమోదు చేయాలని డిమాండ్ చేసింది. విచారణ పూర్తయ్యే వరకు ఈ చిత్రానికి తిరిగి గరిష్ట స్థాయిలో స్క్రీన్లు మరియు షోలను కేటాయించేలా ఆదేశాలు జారీ చేయాలని విజ్ఞప్తి చేసింది. కాగా, హిమాలయ ప్రాంతంలోని ఒక వృద్ధ దంపతుల భావోద్వేగ కథాంశంతో రూపొందిన పైర్ చిత్రం విమర్శకుల ప్రశంసలు అందుకున్నప్పటికీ, ప్రదర్శనశాలల కొరతతో ఇబ్బందులు ఎదుర్కొంటోందని దర్శకుడు వినోద్ కాప్రి ఇటీవల ఆవేదన వ్యక్తం చేసిన విషయం తెలిసిందే.

Also Read: భూ రీసర్వేలో తప్పులకు తావులేకుండా పారదర్శకంగా నిర్వహించాలి: కలెక్టర్ దీపక్ తివారీ