కావ్య మారన్ను అలా చూస్తూ ఉండిపోయిన అనిరుధ్.. గ్రీస్ పెళ్లి వేడుకల కొత్త ఫొటోలు వైరల్
సూర్య ఎంటర్టైన్మెంట్ డెస్క్: ప్రముఖ సంగీత దర్శకుడు అనిరుధ్ రవిచందర్, ప్రముఖ నిర్మాత కళానిధి మారన్ కుమార్తె కావ్య మారన్ గ్రీస్లో జరిగిన వేడుకలో నవంబర్ 11న ఒక్కటైన విషయం తెలిసిందే. అత్యంత సన్నిహితులు, కుటుంబ సభ్యుల సమక్షంలో జరిగిన ఈ వివాహ వేడుకకు సంబంధించిన తాజా ఫొటోలను అనిరుధ్ శుక్రవారం సోషల్ మీడియాలో పంచుకున్నారు. చేతిలో చేయి వేసి నడుస్తున్న సమయంలో కావ్య వైపు అనిరుధ్ ఎంతో ప్రేమగా చూస్తున్న దృశ్యం అభిమానులను విశేషంగా ఆకట్టుకుంటోంది. ఎరుపు రంగు జంప్సూట్లో కావ్య అందంగా మెరిసిపోతుండగా, నలుపు రంగు దుస్తుల్లో అనిరుధ్ ఆమెకు తగ్గట్టుగా కనిపించారు.
ఈ కొత్త ఫొటోల శ్రేణిలో సినీ, రాజకీయ ప్రముఖుల సందడి కూడా ప్రత్యేకంగా నిలిచింది. నూతన వధూవరులతో కలిసి సూపర్స్టార్ రజనీకాంత్ ఆప్యాయంగా ఫొటోలకు పోజులిచ్చారు. తెలుపు రంగు షర్ట్, ట్రౌజర్స్లో రజనీకాంత్, అనిరుధ్ ఒకే తరహా దుస్తుల్లో కనిపించడం విశేషం. అలాగే మరో ఫొటోలో తమిళనాడు ముఖ్యమంత్రి ఎం.కె. స్టాలిన్తో కలిసి నూతన దంపతులు కనిపించారు. మామ కళానిధి మారన్తో కలిసి అనిరుధ్, కావ్య నవ్వులు చిందిస్తున్న ఆత్మీయ క్షణంతో పాటు, సముద్ర తీరంలో చేతులు పట్టుకుని ఒకరినొకరు చూసుకుంటున్న రొమాంటిక్ ఫొటో కూడా నెట్టింట తెగ వైరల్ అవుతోంది. ఫొటోలను పంచుకుంటూ తమ కొత్త ప్రయాణానికి ప్రేమ, ఆశీస్సులు అందించిన అతిథులందరికీ అనిరుధ్ హృదయపూర్వక కృతజ్ఞతలు తెలిపారు.
అనిరుధ్, కావ్య మారన్ ప్రేమ, వివాహంపై గత ఏడాది నుంచే రకరకాల ఊహాగానాలు వినిపిస్తూ వచ్చాయి. పలు వేడుకల్లో వీరిద్దరూ కలిసి కనిపించడంతో వార్తలు మొదలైనప్పటికీ, తొలుత అనిరుధ్ వాటిని కొట్టిపారేశారు. అయితే ఈ ఏడాది ప్రారంభంలో అనిరుధ్ మామ వై.జీ. మహేంద్రన్ చేసిన వ్యాఖ్యలు, జైలర్ 2 స్క్రీనింగ్ సందర్భంగా వీరిద్దరూ కలిసి కనిపించడంతో ఆ వార్తలకు మరింత బలం చేకూరింది. అక్టోబర్లో తెలంగాణ ముఖ్యమంత్రి రేవంత్ రెడ్డి వీరి వివాహం గురించి, నవంబర్ 21న చెన్నైలో జరగనున్న రిసెప్షన్ గురించి ప్రస్తావించడంతో ఈ వ్యవహారంపై స్పష్టత వచ్చింది. ఆ వెంటనే కళానిధి మారన్, కావేరి మారన్ స్వయంగా ప్రముఖులకు ఆహ్వానాలు అందించడంతో పెళ్లి వార్త అధికారికంగా ఖరారైంది. నవంబర్ 10న గ్రీస్లో వేడుకలు ప్రారంభమై, నవంబర్ 11న వివాహ తంతు ఘనంగా ముగిసింది.
Also Read: గోవాలో 20వ వేవ్స్ ఫిల్మ్ బజార్ ప్రారంభం