చైనా మార్కెట్లో తీవ్ర పోటీ నేపథ్యంలో ఆదిత్య బిర్లా గ్రూప్ కీలక నిర్ణయం
షెన్జెన్ హాంగ్జీ సంస్థకు రెండు యూనిట్ల విక్రయ ఒప్పందం వివరాలు
సూర్య బిజినెస్ & కార్పొరేట్ డెస్క్ (ముంబై): ప్రముఖ పారిశ్రామిక దిగ్గజం ఆదిత్య బిర్లా గ్రూప్కు చెందిన హిందాల్కో ఇండస్ట్రీస్ తన అంతర్జాతీయ వ్యాపార వ్యూహంలో భాగంగా కీలక నిర్ణయం తీసుకుంది. హిందాల్కోకు చెందిన అమెరికా అనుబంధ సంస్థ నోవెలిస్ ఇంక్ , చైనాలో ఉన్న తన రెండు పూర్తిస్థాయి అనుబంధ సంస్థలను సుమారు 265 మిలియన్ డాలర్లకు (దాదాపు రూ. 2,340 కోట్లు) విక్రయించేందుకు తుది ఒప్పందం కుదుర్చుకుంది. నిర్దిష్ట లక్ష్యాలను చేరుకున్న పక్షంలో ఈ ఒప్పందం కింద అదనంగా మరో 10 మిలియన్ డాలర్లు లభించే అవకాశం ఉందని హిందాల్కో స్టాక్ ఎక్స్ఛేంజ్ ఫైలింగ్లో వెల్లడించింది.
నవంబర్ 14, 2026న కుదిరిన ఈ ఒప్పందం ప్రకారం, చైనాలోని చాంగ్జౌలో ఆటోమోటివ్ అల్యూమినియం ప్లాంట్ను నిర్వహిస్తున్న నోవెలిస్ (చైనా) అల్యూమినియం ప్రొడక్ట్స్ కో లిమిటెడ్ మరియు నోవెలిస్ (షాంఘై) అల్యూమినియం ట్రేడింగ్ కో లిమిటెడ్ సంస్థలను 'షెన్జెన్ హాంగ్జీ ఇండస్ట్రియల్ ఇన్వెస్ట్మెంట్ కో లిమిటెడ్' లేదా దాని అనుబంధ సంస్థలకు విక్రయించనున్నారు. నియంత్రణ సంస్థల ఆమోదాలకు లోబడి రాబోయే 12 నెలల్లో ఈ లావాదేవీ పూర్తయ్యే అవకాశం ఉంది. ఈ విక్రయం పూర్తయిన తర్వాత సదరు రెండు సంస్థలు హిందాల్కో అనుబంధ సంస్థలుగా కొనసాగవు.
చైనాలో దేశీయ కంపెనీల నుండి పెరుగుతున్న తీవ్రమైన పోటీ, మారుతున్న అంతర్జాతీయ సరఫరా గొలుసు పరిస్థితుల నేపథ్యంలో అక్కడ కార్యకలాపాలను తగ్గించుకోవాలనే వ్యూహంలో భాగంగానే నోవెలిస్ ఈ నిర్ణయం తీసుకున్నట్లు మార్కెట్ వర్గాలు విశ్లేషిస్తున్నాయి. 2025-26 ఆర్థిక సంవత్సరంలో ఈ రెండు చైనా యూనిట్ల నికర అమ్మకాలు 376 మిలియన్ డాలర్లుగా (రూ. 3,319 కోట్లు) నమోదయ్యాయి, ఇది హిందాల్కో మొత్తం ఏకీకృత నికర అమ్మకాలలో కేవలం 1 శాతం మాత్రమే. అలాగే కంపెనీ మొత్తం నికర విలువలో వీటి వాటా 259 మిలియన్ డాలర్లుగా (సుమారు 2 శాతం) ఉంది. చైనాలో ప్రత్యక్ష కార్యకలాపాలను తగ్గించుకున్నప్పటికీ, ఆటోమోటివ్, బేవరేజ్ క్యాన్స్ మరియు ఏరోస్పేస్ రంగాల్లోని అంతర్జాతీయ ఖాతాదారులకు తమ సేవలను యథావిధిగా కొనసాగిస్తామని నోవెలిస్ స్పష్టం చేసింది.