వంటింట నిత్యావసర ధరల మంట..!

- అమ్మో కొనలేము తినలేముంటున్న సామాన్యుడు..
- ధరల పెరుగుదలను నియంత్రించాలని  వేడుకోలు..
నరసన్నపేట
నిత్యావసర సరుకుల ధరలు విపరీతంగా పెరుగుతుండటంతో సామాన్య ప్రజల బతుకులు భారంగా మారుతున్నాయి. బియ్యం నుంచి పప్పులు, వంటనూనె, ఉల్లిపాయల, కూరగాయలు, వరకు అన్ని రకాల సరుకుల ధరలు పెరుగుతుండటంతో పేద, మధ్యతరగతి కుటుంబాల నెలవారీ బడ్జెట్ తలకిందులవుతోంది. ఇప్పటికే పెరుగుతున్న జీవన వ్యయాలతో సతమతమవుతున్న ప్రజలకు నిత్యావసర ధరల పెరుగుదల గుదిబండగా మారింది.

బియ్యం బస్తా కొనాలంటేనే బెంబేలు!

ప్రస్తుతం 26 కిలోల బియ్యం బస్తా ధర రూ.2,000 నుంచి రూ.2,500 వరకు పలుకుతుండటంతో వినియోగదారులపై ఆర్థిక భారం పడుతోంది. మరోవైపు పప్పుల ధరలు కిలో రూ.200 వరకు చేరగా, వంటనూనె ప్యాకెట్ ధర రూ.200 వరకు ఉంటోంది. ఉల్లిపాయల ధరలు కిలో రూ.70 వరకు పలుకుతున్నాయని వినియోగదారులు చెబుతున్నారు. వీటికి తోడు ఇతర నిత్యావసర సరుకుల ధరలు కూడా పెరగడంతో నెలవారీ ఖర్చులు భారీగా పెరుగుతున్నాయి.

ఆదాయం అంతంతే.. ఖర్చులు కొండంత!

రోజువారీ కూలి పనులు చేసుకునే కార్మికులు, చిరుద్యోగులు, చిన్న వ్యాపారులు ధరల భారాన్ని తట్టుకోలేకపోతున్నారు. సంపాదనలో అధిక భాగం ఆహార పదార్థాల కొనుగోలుకే ఖర్చవుతుండటంతో పిల్లల చదువులు, వైద్యం, ఇంటి అద్దె, విద్యుత్ బిల్లులు వంటి ఇతర అవసరాలకు డబ్బులు సర్దుబాటు చేయడం కష్టంగా మారుతోంది. ఆదాయం పెరగకపోయినా ఖర్చులు మాత్రం పెరుగుతుండటంతో కుటుంబ నిర్వహణ భారంగా మారుతోందని పలువురు ఆవేదన వ్యక్తం చేస్తున్నారు.

వంటింటి బడ్జెట్‌కు చిల్లు!

గతంలో నిర్ణీత మొత్తంతో వారానికి సరిపడా సరుకులు కొనుగోలు చేసేవారు. ప్రస్తుతం అదే మొత్తానికి తక్కువ సరుకులే వస్తుండటంతో కొనుగోళ్లను తగ్గించుకోవాల్సిన పరిస్థితి ఏర్పడుతోంది. ముఖ్యంగా పేద కుటుంబాలు పప్పులు, ఇతర ఆహార పదార్థాల కొనుగోలులోనూ ఆచితూచి వ్యవహరించాల్సి వస్తోంది. ధరలు పెరిగినా నిత్యావసర సరుకులను కొనకుండా ఉండలేని పరిస్థితి సామాన్యులది. దీంతో కుటుంబ అవసరాలను తగ్గించుకుంటూ రోజులు నెట్టుకురావాల్సి వస్తోంది.

ధరల నియంత్రణపై చర్యలు తీసుకోవాలి

నిత్యావసర సరుకుల ధరలను నియంత్రించేందుకు సంబంధిత అధికారులు చర్యలు తీసుకోవాలని ప్రజలు కోరుతున్నారు. మార్కెట్‌లో ధరలను ఎప్పటికప్పుడు పర్యవేక్షిస్తూ, అధిక ధరలకు విక్రయించే వ్యాపారులపై నిబంధనల ప్రకారం చర్యలు తీసుకోవాలని విజ్ఞప్తి చేస్తున్నారు. సామాన్యులకు అందుబాటు ధరల్లో నిత్యావసర సరుకులు లభించేలా ప్రభుత్వం తగిన చర్యలు చేపట్టాలని కోరుతున్నారు.

ఒకవైపు పెరుగుతున్న ఖర్చులు.. మరోవైపు పరిమిత ఆదాయంతో సామాన్యుడి జీవనం భారంగా మారుతోంది. నిత్యావసర ధరల నుంచి ఎప్పుడు ఉపశమనం లభిస్తుందోనని ప్రజలు ఎదురుచూస్తున్నారు. వంటింటి ఖర్చుల భారాన్ని తగ్గించే చర్యలు చేపట్టాలని ప్రభుత్వాన్ని కోరుతున్నారు.