విద్యార్థులకు ప్రాక్టికల్ నాలెడ్జ్ ఎంతో అవసరం కొప్పర్తి 'ట్రియో విజన్' పరిశ్రమను సందర్శించిన వల్లూరు ఏపీ మోడల్ స్కూల్ విద్యార్థులు..

విద్యార్థులకు ప్రాక్టికల్ నాలెడ్జ్ ఎంతో అవసరం

కొప్పర్తి 'ట్రియో విజన్' పరిశ్రమను సందర్శించిన

వల్లూరు ఏపీ మోడల్ స్కూల్ విద్యార్థులు..

వల్లూరు మేజర్ న్యూస్:

మండల పరిధిలోని వల్లూరులో ఉన్న ఆంధ్రప్రదేశ్ మోడల్ స్కూల్ వృత్తి విద్యా విభాగం (ఒకేషనల్ ఎడ్యుకేషన్) విద్యార్థులు వైఎస్ఆర్ కడప జిల్లాలోని ప్రతిష్టాత్మక కొప్పర్తి పారిశ్రామిక ప్రాంతంలో విద్యా విజ్ఞాన యాత్రను విజయవంతంగా పూర్తి చేశారు. ఈ పర్యటనలో భాగంగా విద్యార్థులు అక్కడి 'ట్రియో విజన్' పరిశ్రమను ప్రత్యక్షంగా సందర్శించి అనేక నూతన విషయాలను అడిగి తెలుసుకున్నారు. పాఠశాల ప్రిన్సిపాల్ సురేష్ బాబు ప్రత్యేక ఆదేశాలు, పర్యవేక్షణలో ఈ పారిశ్రామిక సందర్శన కార్యక్రమాన్ని ఎంతో ప్రణాళికాబద్ధంగా నిర్వహించారు. ఈ విద్యా యాత్రలో ఐటీ అండ్ ఐటీఈఎస్ వృత్తి విద్యా ఉపాధ్యాయులు శోభనాచారి, ఎలక్ట్రానిక్స్ వృత్తి విద్యా ఉపాధ్యాయురాలు శ్వేత విద్యార్థులకు మార్గనిర్దేశం చేస్తూ వారిని దగ్గరుండి నడిపించారు. ఈ సందర్భంగా పాఠశాల ప్రిన్సిపాల్ సురేష్ బాబు మాట్లాడుతూ నేటి పోటీ ప్రపంచంలో విద్యార్థులకు కేవలం పుస్తక జ్ఞానం మాత్రమే సరిపోదని, చదువుతో పాటుగా ప్రాక్టికల్ నాలెడ్జ్ అందించడం కూడా ఎంతో అవసరమని చెప్పారు. తరగతి గదిలో నేర్చుకున్న పాఠ్యాంశాలు బయటి ప్రపంచంలో ఎలా అమలు అవుతున్నాయో తెలుసుకోవాలనే సదుద్దేశంతోనే ఈ పారిశ్రామిక సందర్శనను ఏర్పాటు చేసినట్లు తెలిపారు. ఐటీ, ఎలక్ట్రానిక్స్ ఉపాధ్యాయులు శోభనాచారి, శ్వేత  మాట్లాడుతూ విద్యార్థులు తాము క్లాస్‌రూమ్‌లో చదువుకున్న సైద్ధాంతిక అంశాలను, ఆధునిక పరిశ్రమల్లో ప్రాక్టికల్ గా ఎలా అప్లై చేస్తారో ప్రత్యక్షంగా చూసి నేర్చుకోవడానికి ఇది ఒక చక్కటి అవకాశమని పేర్కొన్నారు. ఈ సందర్శనలో భాగంగా విద్యార్థులు పరిశ్రమలో వినియోగిస్తున్న అధునాతన సాంకేతికతను, వివిధ వస్తువుల ఉత్పత్తి ప్రక్రియలను, ముఖ్యంగా ఎలక్ట్రానిక్ పరికరాల తయారీ విధానాన్ని ఎంతో ఆసక్తిగా పరిశీలించారు. పరిశ్రమలోని వివిధ విభాగాల పనితీరును అక్కడి ప్రతినిధులు విద్యార్థులకు క్షుణ్ణంగా వివరించారు. ఎప్పటికప్పుడు విద్యార్థులు అడిగిన పలు సాంకేతిక సందేహాలను వారు ఎంతో ఓపికగా నివృత్తి చేశారు. కేవలం పుస్తకాల్లో మాత్రమే చదువుకున్న యంత్రాలను, వాటి పనితీరును ప్రత్యక్షంగా చూడటం ద్వారా తమకు ఎంతో విలువైన అనుభవం లభించిందని విద్యార్థులు సంతోషం వ్యక్తం చేశారు. భవిష్యత్తులో ఉన్నత లక్ష్యాలను చేరుకోవడానికి, తమ కెరీర్‌ను సరైన దిశలో మలచుకోవడానికి ఈ పారిశ్రామిక పర్యటన అద్భుతంగా ఉపయోగపడుతుందని ఈ సందర్భంగా విద్యార్థులు హర్షం వ్యక్తం చేశారు..