విద్యాకమిటీ ఎన్నికల్లోనూ చిత్ర విచిత్రలే...!

ఓటర్లు రాక.. కోరం లేక ఎస్.రాయవరం మండలంలో 3 స్కూల్స్ లో ఎన్నికలు వాయిదా

మేం ఏం తక్కువా...అన్నట్టు ఎస్.రాయవరంలో ఒకటి, దార్లపూడిలో రెండు స్కూల్స్ వాయిదా!

ఎస్.రాయవరం, మేజర్ న్యూస్:
అనకాపల్లి జిల్లా ఎస్.రాయవరం మండలంలో మంగళవారం స్కూల్ కమిటీ ఎన్నికలు రసవత్తరంగా సాగాయి. మండలంలోని 64 పాఠశాలల్లో 61 చోట్ల ఏకగ్రీవంగా ఎన్నికలు పూర్తి కాగా... 3 చోట్ల మాత్రం కోరం లేక వాయిదా పడ్డాయని మండల విద్యాశాఖ అధికారి పెన్నాడ అప్పారావు తెలిపారు.

అందులోనూ ట్విస్ట్ ఏంటంటే... మండలకేంద్రం ఎస్.రాయవరం లో బాలుర హైస్కూల్ ఒక్కటే వాయిదా పడితే... మేం ఏం తక్కువ కాదన్నట్టు పోటీగా దార్లపూడి గ్రామం ఏకంగా రెండు స్కూళ్లలో ఎన్నికలను వాయిదా వేయించింది!

వాయిదా పడ్డ స్కూళ్లు:
ఎస్.రాయవరం బాలుర హైస్కూల్
దార్లపూడి జడ్పీ హైస్కూల్
దార్లపూడి ఎలిమెంటరీ స్కూల్

దార్లపూడి హైస్కూల్లో 260 మంది ఓటర్లకు కనీసం 131 మంది రావాల్సి ఉండగా... అరకొర మంది మాత్రమే వచ్చారు. హైస్కూల్ ప్రధానోపాధ్యాయులు జాన్ మెతూషెలా "రండి బాబూ ఓటేయండి" అని ఫోన్లు చేస్తే... "ఊర్లో లేము, డ్యూటీకి వెళ్ళాలి, చేలో పని ఉంది" అంటూ తల్లిదండ్రులు జారుకోవడంతో ఎన్నిక వాయిదా పడింది. అక్కడే ఉన్న దార్లపూడి ఎలిమెంటరీ స్కూల్ కూడా అదే బాటలో వాయిదా పడింది.

కూటమి నాయకులు మాత్రం టైంకు వచ్చి స్కూల్లో ఆశీనులైనా , ఓటర్లు రాకపోవడంతో వెలవెలబోయి వెనుతిరిగారు.

ఈ మూడు స్కూళ్లలో తిరిగి ఎన్నికలు ఎప్పుడనేది ఉన్నతాధికారుల నిర్ణయం తర్వాత ప్రకటిస్తామని మండల విద్యాశాఖ అధికారి అప్పారావు చెప్పారు.