వర్షాలు నేపద్యంలో ఆరోగ్య జాగ్రత్తలు తప్పనిసరి

సీతానగరం, సూర్య : వర్షాలు కురుస్తున్న నేపధ్యంలో అనారోగ్య సమస్యలు తలెత్తకుండా జాగ్రత్తలు అవసరమని, కాలానుగున రుగ్మతలకు ఆయుర్వేదంతో ఉపశమనం ఉంటుందని జిల్లా ఆయుష్ వైద్యాధికారిణి డాక్టర్ టి. హేమాక్షి తెలిపారు. ఈ మేరకు సోమవారం నీలకంఠాపురం (చిన్నయ్యవలస) గ్రామంలో ఉచిత ఆయుర్వేద వైద్య శిబిరం నిర్వహించారు. దగ్గు , పడిశం, వాతం, ఇతర సీజనల్ రుగ్మతలకు డాక్టర్ హేమాక్షి తనిఖీలు నిర్వహించి చికిత్స అందించారు. అవసరమైన ఆయుర్వేద మందులు సిబ్బంది అందజేసి వినియోగించే విధానాన్ని వివరించారు. వర్షాలు కారణంగా ఇంటి పరిసరాలలో నీరు నిల్వ లేకుండా చూసుకోవాలని, కాచి చల్లార్చిన నీరు తాగాలని, సాధ్యమైనంతవరకు వేడిగా ఉండే ఆహార పదార్థాలు తీసుకోవాలని, పిల్లలు వర్షంలో తడవకుండా జాగ్రత్తపడాలని, ఆవిరి పట్టడంతో శ్వాస సునాయాసం అవుతుందని, చేతులను ఎప్పటికప్పుడు శుభ్రంగా ఉంచుకోవాలని అవగాహన కల్పించారు. ఇటువంటి రుగ్మతలకు ఆయుర్వేదంతో మంచి ఫలితాలు ఉంటాయన్నారు. ఈ కార్యక్రమంలో ఆయుష్ స్టాఫ్ పద్మ తదితరులు పాల్గొన్నారు.