వైసీపీ మేయర్ అభ్యర్థి రమేష్ గౌడ్‌కు 49వ డివిజన్ ముస్లిం మైనార్టీ నాయకుల మద్దతు
అనంతపురం బ్యూరో (అనంతపురం బ్యూరో, మేజర్ న్యూస్) : అనంతపురం నగరపాలక సంస్థ మేయర్ పదవికి వైఎస్సార్ కాంగ్రెస్ పార్టీ అభ్యర్థిగా బరిలో ఉన్న సి. రమేష్ గౌడ్‌కు 49వ డివిజన్‌కు చెందిన ముస్లిం మైనార్టీ నాయకులు తమ మద్దతు ప్రకటించారు. ఈ సందర్భంగా రమేష్ గౌడ్‌ను ఆప్యాయంగా పలకరిస్తూ.. “బేటా.. మా ఓటు నీకే వేస్తాం” అంటూ తమ మద్దతును వ్యక్తం చేశారు.
49వ డివిజన్ వైసీపీ కార్పొరేటర్ అభ్యర్థి ఆరిఫా నేతృత్వంలో ముస్లిం మైనార్టీ నాయకులు రమేష్ గౌడ్‌ను కలిసి ఎన్నికల్లో తమ మద్దతు ఉంటుందని తెలిపారు. అనంతరం ఆయన ఎన్నికల ప్రచారంలో పాల్గొంటూ డివిజన్ ప్రజలను వైసీపీ అభ్యర్థులకు మద్దతు ఇవ్వాలని కోరారు.
ఈ సందర్భంగా రమేష్ గౌడ్ మాట్లాడుతూ, మేయర్‌గా ఎన్నికైతే నగర ప్రజలకు ఎల్లప్పుడూ అందుబాటులో ఉంటానని, ప్రజా సమస్యల పరిష్కారానికి ప్రాధాన్యమిస్తూ నగర అభివృద్ధి లక్ష్యంగా పనిచేస్తానని పేర్కొన్నారు. ప్రజల అవసరాలను గుర్తించి, అన్ని వర్గాల ప్రజలకు సేవలందించేందుకు కృషి చేస్తానని తెలిపారు. అలాగే, కూటమి ప్రభుత్వానికి ఓటు వేసి మోసపోవద్దని ముస్లిం మైనార్టీ నాయకులకు విజ్ఞప్తి చేశారు.
ఈ కార్యక్రమంలో మాజీ మార్కెట్ చైర్మన్ ఏకేఎస్ ఫయాజ్, మాజీ వక్ఫ్ బోర్డు చైర్మన్ కాగజ్‌గర్ రిజ్వాన్, కలందర్, శమ్ము, మాభాష, షౌకత్, గౌస్ తదితర ముస్లిం మైనార్టీ నాయకులు పాల్గొన్నారు.
రమేష్ గౌడ్ నాయకత్వంపై తమకు నమ్మకం ఉందని, ఆయన నగర అభివృద్ధికి కట్టుబడి పనిచేస్తారని నాయకులు ఆశాభావం వ్యక్తం చేశారు. ఈ సందర్భంగా వైసీపీ కార్యకర్తలు, స్థానికులు పాల్గొని అభ్యర్థికి తమ సంఘీభావాన్ని తెలిపారు.
