వైఎస్ జగన్‌ను కలిసిన కోరుకొండ వైఎస్సార్‌సీపీ విజేత ఎంపీటీసీ సభ్యులు: అభినందించిన అధినేత
సూర్య ఏపీ డెస్క్: తూర్పుగోదావరి జిల్లా రాజానగరం నియోజకవర్గం పరిధిలోని కోరుకొండ మండలంలో వైఎస్సార్‌సీపీ తరఫున ఎంపీటీసీ సభ్యులుగా విజయం సాధించిన అభ్యర్థులు పార్టీ అధినేత, మాజీ ముఖ్యమంత్రి వైఎస్ జగన్మోహన్ రెడ్డిని మర్యాదపూర్వకంగా కలిశారు. మాజీ ఎమ్మెల్యే, వైఎస్సార్‌సీపీ యువజన విభాగం రాష్ట్ర అధ్యక్షులు జక్కంపూడి రాజా సారథ్యంలో గెలుపొందిన ఎంపీటీసీ సభ్యులు బుధవారం రాత్రి జగన్‌తో సమావేశమయ్యారు. ఈ సందర్భంగా విజేతలను జక్కంపూడి రాజా పార్టీ అధినేతకు పరిచయం చేశారు.
స్థానిక సంస్థల ఎన్నికల్లో రాష్ట్రవ్యాప్తంగా పార్టీకి ప్రతికూల పరిస్థితులు ఎదురైనప్పటికీ, రాజానగరం నియోజకవర్గంలో వైఎస్సార్‌సీపీ మెరుగైన ఫలితాలు సాధించడంపై వైఎస్ జగన్మోహన్ రెడ్డి హర్షం వ్యక్తం చేశారు. ఈ సందర్భంగా విజయం సాధించిన ఎంపీటీసీ సభ్యులతో పాటు వారి గెలుపు కోసం కృషి చేసిన జక్కంపూడి రాజాను జగన్ ప్రత్యేకంగా అభినందించారు. ముఖ్యంగా కోరుకొండ మండలంలో జనసేన పార్టీ ఎంపీపీ అభ్యర్థిని ఓడించి విజయం సాధించిన పెన్నాడ సుమను జగన్ ప్రత్యేకంగా ప్రశంసించారు.
అనంతరం ఎంపీటీసీ సభ్యులకు జగన్ భరోసా కల్పిస్తూ దిశానిర్దేశం చేశారు. రానున్న రోజుల్లో క్షేత్రస్థాయిలో పార్టీ బలోపేతానికి మరింత సమర్థవంతంగా పనిచేయాలని సూచించారు. త్వరలో జరగనున్న పంచాయతీ ఎన్నికల్లోనూ ఇదే స్ఫూర్తిని కొనసాగిస్తూ పార్టీ సానుభూతిపరుల విజయానికి సమిష్టిగా కృషి చేయాలని పిలుపునిచ్చారు.
వైఎస్ జగన్‌ను కలిసిన వారిలో ఎంపీటీసీ సభ్యులు పట్నాల సత్యనారాయణ (కోటికేశవరం), నేతుల లక్ష్మీనారాయణ, వెంకట దుర్గా కళ్యాణి (కోరుకొండ-1), కొండము లక్ష్మి (కాపవరం), అనపర్తి మణికంఠ (బుచ్చంపేట), తుమ్మల లక్ష్మి (జగన్నాధపురం), మొకమాటి (జంబుపట్నం), గొడ్డు మహాలక్ష్మి, కర్రీ నాగదుర్గ వెంకటేశ్వరరావు (దోసకాయలపల్లి), దాడి శ్రీను (నిడిగట్ల) తదితరులు ఉన్నారు.
