వచ్చే నెలలోనే చింతలపూడి పనులు ప్రారంభం.. ఎంపీ పుట్టా మహేష్ కుమార్
ఏలూరు,/ చింతలపూడి సూర్య న్యూస్ ఎత్తిపోతల పథకానికి అడ్డంకులు తొలగిపోయాయని, ప్రాజెక్టు పనులు వచ్చే నెలలోనే మొదలవుతాయనీ ఎంపీ పుట్టా మహేష్ కుమార్ స్పష్టం చేశారు. ఈమేరకు శనివారం మీడియోకు ఎంపీ ప్రకటన విడుదల చేశారు. సగం పైగా పూర్తయ్యి, గత ప్రభుత్వం నిర్లక్ష్యం వల్ల ఆగిపోయిన చింతలపూడి ప్రాజెక్టును పూర్తి చేసేందుకు కూటమి ప్రభుత్వం వచ్చిన తర్వాత అన్ని అడ్డంకులను తొలగించుకుంటూ ముందుకు వెళుతున్నామని చెప్పారు. ఇటీవలే కేంద్ర అటవీ పర్యావరణ శాఖ కూడా గ్రీన్ సిగ్నల్ ఇచ్చిన విషయాన్ని ఎంపీ గుర్తు చేశారు. త్వరగా పనులు మొదలు పెట్టేందుకు ఏర్పాట్లు చేయాలని సీఎం చంద్రబాబు చెప్పారని, వచ్చే నెలలోనే (నవంబర్) పనులు మొదలు పెడతామని చెప్పిన ఎంపీ, చింతలపూడి ఎత్తిపోతల ప్రాజెక్టు పూర్తయితే, ఏలూరు జిల్లాలో దాదాపు లక్ష ఎకరాలకు కాలువల ద్వారా సాగునీరు అందుతుందని చెప్పారు. చింతలపూడి, నూజివీడు నియోజకవర్గంలోని మెట్ట ప్రాంత రైతుల భూములకు సమృద్ధిగా నీరు అందుతుందని, కాలువలు చెరువులు నింపడం ద్వారా భూగర్భ జలాలు పెరుగుతాయనీ, తాగునీటి సమస్యలు కూడా తీరుతాయని ఎంపీ వివరించారు.
ఒకవైపు పోలవరం ప్రాజెక్టు పనులు తుదిదశకు చేరుతున్నాయనీ, వచ్చే ఏడాది పోలవరం ప్రాజెక్టు ప్రారంభించబోతున్నామని చెప్పిన ఎంపీ ఇప్పుడు చింతలపూడి ప్రాజెక్టు పనులు కూడా మొదలు పెట్టడం ఏలూరు పార్లమెంట్ ప్రజలకు శుభవార్త అన్నారు. ముఖ్యమంత్రి చంద్రబాబు నాయుడు, రాష్ట్ర నీటిపారుదల శాఖా మంత్రి నిమ్మల రామానాయుడు పర్యవేక్షణలో రెండేళ్లలో ఈ ప్రాజెక్టును పూర్తిచేసి జాతికి అంకితం చేస్తామని ఎంపీ స్పష్టం చేశారు. ఈ రెండు ప్రాజెక్టులు పూర్తయితే ఏలూరు జిల్లాలో నీటి కొరత ఉండదని తెలిపిన ఎంపీ, ఈ ప్రాజెక్టు కల సాకారం కావడానికి కృషి చేస్తున్న ముఖ్యమంత్రి చంద్రబాబు నాయుడుకు, రాష్ట్రానికి అన్ని విధాలుగా సహకరిస్తున్న ప్రధాని నరేంద్ర మోదీకి, ఉప ముఖ్యమంత్రి పవన్ కళ్యాణ్, మంత్రి నారా లోకేష్, మంత్రి నిమ్మల రామానాయుడులకు కృతజ్ఞతలు తెలియచేశారు. కూటమి ప్రభుత్వం చేస్తున్న ఈ అభివృద్దిని ప్రజలందరూ గుర్తించాలని, ఆయన అన్నారు
