తుఫాను ఎదుర్కోడానికి నగరం పోలీసులు సంసిద్ధం

నగరం, మేజర్ న్యూస్: వాతావరణ శాఖ ఆదేశాల మేరకు తుఫాను ఎదుర్కోవడానికి నగరం పోలీసులు సిద్ధంగా ఉన్నట్లు స్థానిక ఎస్సై చెన్నకేశవులు  స్పష్టం చేశారు. రాష్ట్రంలో అర్ణబ్ తుఫాన్ ప్రభావం ఎక్కువగా ఉంటుందన్న సూచనలతో సముద్ర తీర ప్రాంతంలో ఉన్న నగరం పోలీస్ స్టేషన్ కు ఒక జెసిబి, కూలిన చెట్లను తొలగిం చేందుకు చెట్లను కోసే మిషన్లతో సిద్ధంగా ఉన్నట్లు ఆయన తెలిపారు.  మండలంలోని 27 పంచాయతీల పరిధిలో ఎక్కడైనా తుఫాను ప్రభావం వల్ల రాకపోకలకు అంతరాయం కలిగిన వెంటనే పోలీసు వారికి సమాచారం ఇవ్వాలని ఎస్ఐ  మండల ప్రజానీకానికి విజ్ఞప్తి చేశారు. జిల్లా ఎస్పీ ఉమామహేశ్వరరావు ఆదేశాలతో బాపట్ల డిఎస్పి అజీజ్, సిఐ సురేష్ బాబు నేతృత్వంలో తుఫాను  ఎదుర్కోవడానికి పోలీసులు సంసిద్ధంగా ఉన్నారని ఆయన స్పష్టం చేశారు. ప్రజలు అప్రమత్తంగా ఉండి వాతావరణ శాఖ సూచనలను పాటిస్తూ సురక్షితంగా ఉండాలని ఆయన విజ్ఞప్తి చేశారు. మండల ప్రజానీకానికి ఎటువంటి సమాచారం, సహాయ సహకారాలు అవసరమైన వెంటనే 9440900877నంబర్ లో సంప్రదించాలని ఆయన తెలియజేశారు.