తుఫాన్ హెచ్చరికల నేపథ్యంలో అప్రమత్తమైన యంత్రాంగం

​పార్వతీపురం, అక్టోబర్ 27: మేజర్ న్యూస్ :;అర్నబ్' తుఫాన్ ముప్పు, భారీ వర్షాలు, ఈదురుగాలుల హెచ్చరికల నేపథ్యంలో పార్వతీపురం మన్యం జిల్లా కలెక్టర్ డా. ఎన్. ప్రభాకర రెడ్డి వివిధ శాఖల అధికారులతో మంగళవారం జూమ్ కాన్ఫరెన్స్ నిర్వహించారు. ఈ సమావేశంలో జిల్లాలో చేపట్టవలసిన ముందస్తు రక్షణ చర్యలపై అధికారులకు పలు కీలక సూచనలు అందజేశారు. తుఫాన్ ప్రభావం చూపే అవకాశం ఉన్నందున సంబంధిత శాఖల అధికారులు క్షేత్రస్థాయిలో అందుబాటులో ఉంటూ పరిస్థితిని ఎప్పటికప్పుడు పర్యవేక్షించాలని ఆదేశించారు. తుఫాన్ సమయంలో మరియు ఆ తర్వాత చేపట్టాల్సిన విపత్తు నిర్వహణ కార్యక్రమాలపై సంబంధిత శాఖలు తక్షణమే తగిన ప్రణాళికలు రూపొందించుకొని, క్షేత్రస్థాయిలో ముమ్మరంగా సహాయక చర్యలు చేపట్టాలని కలెక్టర్ స్పష్టం చేశారు. ఎలాంటి ప్రాణ లేదా ఆస్తి నష్టం జరగకుండా కట్టుదిట్టమైన ముందస్తు జాగ్రత్త చర్యలు తీసుకోవాలని, విద్యుత్, తాగునీరు, వైద్యం తదితర అత్యవసర సేవలకు ఎలాంటి అంతరాయం కలగకుండా ప్రత్యామ్నాయ ఏర్పాట్లు సిద్ధం చేసుకోవాలని సూచించారు. విపత్తును సమర్థవంతంగా ఎదుర్కొనేందుకు రెవెన్యూ, పోలీసు, పంచాయతీ రాజ్, ఇంజనీరింగ్ తదితర అన్ని శాఖల మధ్య సరైన సమన్వయం ఉండాలని పేర్కొన్న ఆయన, జిల్లా విపత్తు నివారణా అధికారికి హైడ్రాలిక్ మిషన్ తెప్పించి ఎల్లప్పుడూ సిద్ధంగా ఉంచాలన్నారు. లోతట్టు ప్రాంతాల ప్రజలను ఎప్పటికప్పుడు అప్రమత్తం చేయడం మరియు సురక్షిత ప్రాంతాల్లో పునరావాస కేంద్రాల ఏర్పాటుపై ప్రత్యేక దృష్టి పెట్టాలని అధికారులను ఆదేశించారు. ఈ జూమ్ సమావేశంలో జాయింట్ కలెక్టర్ ఆర్. వైశాలి, పార్వతీపురం, పాలకొండ సబ్ కలెక్టర్లు సచిన్ అర్చిత రహార్, పవార్ స్వప్నిల్ జగన్నాధ్, డి.ఆర్.ఓ కె. హేమలత, జిల్లా వైద్య ఆరోగ్య అధికారి డా. విజయలక్ష్మి, డ్వామా పి.డి. రామచంద్రరావు, డి.ఆర్.డి.ఎ పి.డి. ప్రభావతి, జెడ్.పి. సి.ఇ.ఓ సుధాకర్, ఐ.సి.డి.ఎస్ పి.డి. కనకదుర్గ, డిస్ట్రిక్ట్ ఫైర్ ఆఫీసర్ సింహాచలం, జిల్లా వ్యవసాయ అధికారి భవానీ శంకర, డి.ఎస్.ఓ అశోక్, ఎ.పి.ఇ.పి.డి.సి.ఎల్ ఎస్.ఇ. త్రినాధ్ రావు తదితర సంబంధిత శాఖల అధికారులు పాల్గొన్నారు.