తిరుమలలో భక్తుల రద్దీ సాధారణం
తిరుమల: కలియుగ ప్రత్యక్ష దైవం తిరుమల శ్రీవేంకటేశ్వర స్వామివారి ఆలయంలో భక్తుల రద్దీ సాధారణంగా కొనసాగుతోంది. శుక్రవారం ఉదయం సమయానికి శ్రీవారి సర్వదర్శనం కోసం భక్తులు వైకుంఠం క్యూ కాంప్లెక్స్లోని 16 కంపార్ట్మెంట్లలో వేచి ఉన్నారు.
దర్శన టోకెన్లు లేని భక్తులు శ్రీవారిని దర్శించుకోవడానికి సుమారు 8 గంటల సమయం పడుతోంది. ఇక గురువారం (నవంబర్ 19) నాడు మొత్తం 67,915 మంది భక్తులు శ్రీవారిని దర్శించుకుని మొక్కులు చెల్లించుకున్నారు. వీరిలో 23,399 మంది భక్తులు స్వామివారికి తలనీలాలు సమర్పించారు. నిన్న ఒక్కరోజే శ్రీవారి హుండీ ద్వారా రూ. 4.61 కోట్ల ఆదాయం లభించినట్లు తిరుమల తిరుపతి దేవస్థానం (టీటీడీ) అధికారులు వెల్లడించారు.